ព័ត៌មានក្នុងខេត្ត

លោក សុខ ថុល អភិបាលរងខេត្តសៀមរាប បានទទួលជួបពិភាក្សាការងារជាមួយគណៈប្រតិភូក្រុមហ៊ុន Hainan Development Holdings មកពីប្រទេសចិន ដើម្បីសិក្សា និងពង្រឹងកិច្ចសហប្រតិបត្តិការលើការតភ្ជាប់ជើងហោះហើរត្រង់។ ជំនួបនេះផ្តោតលើការហោះហើររវាងភ្នំពេញ-ហៃគូ និងការសិក្សាបន្ថែមសម្រាប់ផ្លូវហោះហើរ សៀមរាប-ហៃគូ តាមរយៈអនុស្សរណៈយោគយល់គ្នារវាងក្រុមហ៊ុនអាកាសចរណ៍ Air Cambodia និងអាកាសយានដ្ឋានអន្តរជាតិហៃណាន ក្នុងគោលបំណងជំរុញ និងផ្លាស់ប្តូរវិស័យទេសចរណ៍រវាងកម្ពុជា និងខេត្តហៃណាន។

មន្ទីរផែនការខេត្តសៀមរាប បើកកិច្ចប្រជុំស្ដីពីការបំពេញទិន្នន័យរដ្ឋបាលរបស់មន្ទីរអង្គភាព ដើម្បីចងក្រង វិភាគទិន្នន័យស្ថិតិរដ្ឋបាលនៅថ្នាក់ក្រោមជាតិតាមវិស័យនីមួយៗ

ក្នុងន័យចូលរួមលើកកម្ពស់អភិបាលកិច្ចល្អក្នុងការផ្តល់សេវាសាធារណៈ និងការអភិវឌ្ឍនៅថ្នាក់ក្រោមជាតិ ការិយាល័យប្រជាពលរដ្ឋខេត្តសៀមរាប បានបន្តចុះធ្វើការផ្សព្វផ្សាយពីតួនាទី ភារកិច្ច និងសមត្ថកិច្ចរបស់ការិយាល័យប្រជាពលរដ្ឋរាជធានីខេត្ត ព្រមទាំងរបៀបប្រើប្រាស់កម្មវិធីទូរស័ព្ទដៃ «មតិយើង» ជូនដល់សាស្ត្រាចារ្យ និងនិស្សិតនៃសាកលវិទ្យាល័យនានាក្នុងក្រុងសៀមរាប តបតាមការណែនាំរបស់ក្រសួងមហាផ្ទៃ និងការចង្អុលបង្ហាញរបស់ ឯកឧត្តម លី សំរិទ្ធ ប្រធានក្រុមប្រឹក្សាខេត្ត។

សាខាកាកបាទក្រហមកម្ពុជា ខេត្តសៀមរាប ផ្ដល់អំណោយជូនគ្រួសារវីរកងទ័ព ដែលរងគ្រោះដោយអគ្គីភ័យក្នុងសង្កាត់គោកចក ក្រុងសៀមរាប

អំពូលសូឡាចំនួន ៤០ដើម គិតជាទឹកប្រាក់សរុប ២ ៦០០ដុល្លារ ដោយមានការចូលរួមគាំទ្រពីសប្បុរសជន បងប្អូនប្រជាពលរដ្ឋ ត្រូវបានដំឡើងរួចរាល់តាមបណ្តោយផ្លូវបេតុងសាលាពោធិនរាយណ៍ ក្នុងភូមិកក្រាញ់ សង្កាត់សៀមរាប ក្រុងសៀមរាប ជួយកាត់បន្ថយគ្រោះថ្នាក់ចរាចរណ៍ និងបង្កើនសន្តិសុខនៅពេលយប់ កែប្រែមុខមាត់ភូមិសង្កាត់ឱ្យមានភាពស្រស់ស្អាត ទាក់ទាញនាពេលរាត្រី រួមចំណែកដល់វិស័យទេសចរណ៍។

នៅថ្ងៃទី៩ ខែមិថុនា ឆ្នាំ២០២៦ លោកស្រី ម៉ននី រង្សី អភិបាលរងខេត្តសៀមរាប បានទទួលជួបពិភាក្សាការងារជាមួយក្រុមការងារយេនឌ័រ នៃអគ្គនាយកដ្ឋានរដ្ឋបាល ក្រសួងមហាផ្ទៃ ដឹកនាំដោយ លោកស្រី តៅ សុខម៉ារ៉ា អគ្គនាយករង ដើម្បីសិក្សាស្វែងយល់ការបញ្ជ្រាបយេនឌ័រ និងការលើកកម្ពស់តួនាទីភារកិច្ចស្រ្តី ក្នុងភាពជាអ្នកដឹកនាំនៅរដ្ឋបាលខេត្តសៀមរាប ដោយមានការចូលរួមពីលោកជំទាវ ស៊ិន ណម សមាជិកក្រុមប្រឹក្សាខេត្តផងដែរ។

នារសៀលថ្ងៃទី៩ ខែមិថុនា ឆ្នាំ២០២៦ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញសម្ពោធដាក់ឱ្យប្រើប្រាស់ជាផ្លូវការ នូវប្រព័ន្ធគ្រប់គ្រងព្រំដែនកម្ពុជា ជំនាន់ទី២ (CBMS-2) និងមុខងារឌីជីថលអន្តោប្រវេសន៍ថ្មីៗ នៅអាកាសយានដ្ឋានអន្តរជាតិសៀមរាប-អង្គរ ដើម្បីជួយពង្រឹងសមត្ថភាពរបស់កងកម្លាំងអន្តោប្រវេសន៍ ក្នុងការពិនិត្យតាមដាន និងរក្សាការពារសន្តិសុខជាតិឱ្យកាន់តែមានប្រសិទ្ធភាព ស្របតាមយុគសម័យឌីជីថល។

កាលពីថ្ងៃទី៨ ខែមិថុនា ឆ្នាំ២០២៦ ព្រះវិចិត្រវង្សា ហែម គឹមសាន ចៅអធិការវត្តប្រាសាទគោកចក និងលោកស្រី ឈិន សាវី ចៅសង្កាត់សង្កាត់គោកចក ក្រុងសៀមរាប បាននាំយកអំណោយជាគ្រឿងឧបភោគបរិភោគ សម្ភារប្រើប្រាស់ និងថវិកាមួយចំនួន ប្រគល់ជូនដល់គ្រួសារកងទ័ពដែលកំពុងភារកិច្ចតាមបន្ទាត់ព្រំដែន ហើយបានរងគ្រោះដោយសារអគ្គីភ័យឆាបឆេះផ្ទះ កាលពីថ្ងៃទី៧ ខែមិថុនា ឆ្នាំ២០២៦ ស្ថិតក្នុងភូមិគោកចាន់។

នៅថ្ងៃទី៨ ខែមិថុនា ឆ្នាំ២០២៦ រដ្ឋបាលខេត្តសៀមរាប បានរៀបចំកិច្ចប្រជុំប្រចាំត្រីមាស ស្តីពីការពិនិត្យវឌ្ឍនភាពនៃការអនុវត្តផែនការសកម្មភាពគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ជ.អ.ជ ប្រចាំឆ្នាំ២០២៦ ដើម្បីពិនិត្យលើសមិទ្ធផលដែលអនុវត្តបានកន្លងមក ទាំងការងារកំណែទម្រង់រដ្ឋបាល ថ្នាក់ក្រោមជាតិ ការពង្រឹងសមត្ថភាពមន្ត្រី ការផ្តល់សេវាសាធារណៈជូនប្រជាពលរដ្ឋតាមរយៈយន្តការច្រកចេញចូលតែមួយ និងការអភិវឌ្ឍហេដ្ឋារចនាសម្ព័ន្ធមូលដ្ឋាន។

ថ្នាក់ដឹកនាំខេត្តសៀមរាប ចែករំលែកបទពិសោធន៍ពីការគ្រប់គ្រងរដ្ឋបាល និងតួនាទី ភារកិច្ចរបស់រដ្ឋបាលខេត្តជូនសិស្សានុសិស្ស និងសាធារណជនក្នុងខេត្ត នារសៀលថ្ងៃទី៨ ខែមិថុនា ឆ្នាំ២០២៦ លោក នាក់ ណេរ៉ុន អភិបាលរងខេត្តសៀមរាប បានអញ្ជើញចែករំលែកពីការអភិវឌ្ឍខ្លួន ក្រោមប្រធានបទ «ការគ្រប់គ្រងរដ្ឋបាល និងតួនាទី ភារកិច្ចសំខាន់ៗ នៃរដ្ឋបាលខេត្តសៀមរាប» ដែលរៀបចំឡើងនៅសាលាហ្គោគ្លូប៊ល ក្នុងគោលបំណងចែករំលែកចំណេះដឹង បទពិសោធន៍ និងការយល់ដឹងអំពីការគ្រប់គ្រងរដ្ឋបាលសាធារណៈ ព្រមទាំងតួនាទី និងភារកិច្ចសំខាន់ៗរបស់រដ្ឋបាលខេត្តសៀមរាប ដល់សិស្សានុសិស្ស និងសាធារណជន។

សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី នៃព្រះរាជាណាចក្រកម្ពុជា អញ្ជើញជួបសំណេះសំណាលជាមួយក្រុមប្រឹក្សាខេត្ត ក្រុង ស្រុក ឃុំសង្កាត់ និងថ្នាក់ដឹកនាំមន្ទីរអង្គភាពនានាជុំវិញខេត្តសៀមរាប និងខេត្តឧត្តរមានជ័យ។

ក្នុងឱកាសបើកវគ្គបណ្តុះបណ្តាលស្ដីពី “ការអភិវឌ្ឍន៍គម្រោងអាជីវកម្មឌីជីថល” នៃកម្មវិធីយុវជន២១ ឆ្នាំ២០២៦ ក្រោមប្រធានបទការចាប់ផ្ដើមអាជីវកម្មបច្ចេកវិទ្យារបស់យុវជន “គំនិតវ័យក្មេង ការផ្លាស់ប្ដូរពិត” នៅខេត្តសៀមរាប នាថ្ងៃទី៩ ខែមិថុនានេះ ឯកឧត្តម កុលផេង វឌ្ឍនា អនុរដ្ឋលេខាធិការក្រសួងអប់រំ បានលើកឡើងថា ភាពជោគជ័យមិនមែនកើតឡើងដោយសារតែការពឹងផ្អែកលើការលើកទឹកចិត្ត (Motivation) តែមួយមុខនោះទេ ប៉ុន្តែវាទាមទារនូវ «វិន័យ» (Discipline) ជាគ្រឹះដ៏សំខាន់សម្រាប់យុវជនកម្ពុជាយើងគ្រប់រូប។