ព័ត៌មានក្នុងខេត្ត

គណៈកម្មាធិការត្រួតពិនិត្យផលិតផលហាឡាលកម្ពុជា (គ.ត.ផ.ហ.ក) បានបង្ហាញថា ការជំរុញការចុះបញ្ជីផលិតផលហាឡាល មិនមែនជាការបង្កើនបន្ទុកដល់ក្រុមហ៊ុន សហគ្រាស សិប្បកម្ម និងអាជីវកម្មនោះទេ ប៉ុន្ដែជាការចូលរួមជំរុញការបង្កើនតម្លៃ និងការជឿទុកចិត្ដមកលើសេវាកម្ម និងផលិតផលនៅក្នុងស្រុក ដោយមានការបញ្ជាក់បច្ចេកទេសស្ដង់ដាផលិតផលហាឡាលកម្ពុជាលើអនុលោមភាព អនាម័យ គុណភាព និងស្ដង់ដា ដែលអនុលោមតាមគោលការណ៍សុវត្ថិភាពម្ហូបអាហារ និងលក្ខខណ្ឌតម្រូវតាមសាសនាឥស្លាម។

នាយប់ថ្ងៃពេញបរមី ខែអស្សុជ ត្រូវនឹងថ្ងៃទី២៦ ខែតុលា ឆ្នាំ២០២៦នេះ ព្រះសង្ឃ គណៈកម្មការ អាចារ្យ និងប្រជាពលរដ្ឋចំណុះជើងវត្តអារញ្ញសាគរ ក្រុងសៀមរាប សហការគាំទ្រពីអាជ្ញាធរមូលដ្ឋាន បានរៀបចំពិធីដង្ហែសង្ឃឹកប្រទីបជ្វាលា តាមបណ្តោយដងស្ទឹងសៀមរាប ចាប់ពីវត្តពោធិបន្ទាយជ័យ ទៅកាន់ចុងទឹកសាលាឆទានយាយអេង ក្បែរភូមិសាស្ត្រភ្នំក្រោម បឹងទន្លេសាប។

នារសៀលថ្ងៃទី២៦ ខែតុលា ឆ្នាំ២០២៦ លោក សុខ ថុល អភិបាលរងខេត្ត បានដឹកនាំកិច្ចប្រជុំត្រួតពិនិត្យចំពោះការចេញបណ្ណសមធម៌ដល់គ្រួសារក្រ១ក្រ២ នៅសង្កាត់ចុងឃ្នៀស ដែលមានភាពមិនប្រក្រតីកន្លងមក ដើម្បីបង្ហាញពីតម្លាភាព និងប្រសិទ្ធភាពជូនប្រជាពលរដ្ឋ។

ក្នុងឱកាសអញ្ជើញជាអធិបតីក្នុងសន្និបាតបូកសរុបលទ្ធផលការងារប្រចាំ ឆ្នាំ២០២៦ និងទិសដៅបន្តការងារ ឆ្នាំ២០២៧ របស់មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប នៅថ្ងៃទី២៦ ខែតុលា ឆ្នាំ២០២៦នេះ ឯកឧត្តម លាង មុនីរិទ្ធ រដ្ឋលេខាធិការក្រសួងរៀបចំដែនដី បានបញ្ជាក់ថា បច្ចុប្បន្នក្រសួង និងរដ្ឋបាលខេត្តសៀមរាប បាននិងកំពុងបង្កើនការយកចិត្តទុកដាក់លើការងាររៀបចំដែនដី នគរូបនីយកម្ម និងការដោះស្រាយបញ្ហាសំណង់មិនរៀបរយ ព្រមទាំងជំរុញការចុះបញ្ជីដីធ្លីជូនប្រជាពលរដ្ឋឱ្យបានឆាប់រហ័ស ដើម្បីលើកកម្ពស់ជីវភាព និងសោភណភាពទីក្រុងបេតិកភណ្ឌមួយនេះ។

ថ្លែងក្នុងកិច្ចប្រជុំគណៈកម្មាធិការសម្របសម្រួលរួមលើកទី៣ នៃគម្រោងអនុវត្តវិធីសាស្រ្តទីក្រុងឆ្លាតវៃ ដើម្បីដោះស្រាយបញ្ហាទីក្រុងក្នុងខេត្ដសៀមរាប ដំណាក់ទី២ នៅថ្ងៃទី២៦ ខែតុលា ឆ្នាំ២០២៦ ឯកឧត្តម អ៊ុំ ម៉ារ៉ា រដ្ឋលេខាធិការក្រសួងមហាផ្ទៃ និងជាប្រធានគណៈកម្មាធិការសម្របសម្រួល នៃគម្រោងអនុវត្តទីក្រុងឆ្លាតវៃ បានធ្វើការជំរុញដល់ក្រុមការងារលេខាធិការដ្ឋាន និងដៃគូពាក់ព័ន្ធទាំងអស់ បន្តពង្រឹងលើការអនុវត្តការងារគម្រោង ដើម្បីឆ្ពោះទៅសម្រេចបាននូវលទ្ធផលជាក់ស្ដែងនាពេលខាងមុខ។

នៅថ្ងៃទី២៦ ខែតុលា ឆ្នាំ២០២៦ អាជ្ញាធរខេត្តសៀមរាប បានបន្តចុះផ្សព្វផ្សាយអំពីបែបបទ នីតិវិធីនៃការទទួល ផ្ដល់សេវារដ្ឋបាល នៅអង្គភាពច្រកចេញចូលតែមួយ នៃរដ្ឋបាលខេត្ត និងធ្វើការបង្ហាញពីការចូលប្រើប្រាស់កម្មវិធីព័ត៌មានវិទ្យាសម្រាប់ទទួលពាក្យស្នើសុំ និងផ្ដល់សេវារដ្ឋបាលតាមប្រព័ន្ធអនឡាញ នៅអង្គភាពច្រកចេញចូលតែមួយ ជូននិស្សិតនៅសាកលវិទ្យាល័យអង្គរ ខេត្តសៀមរាប។

នៅថ្ងៃទី២៦ ខែតុលា ឆ្នាំ២០២៦នេះ អង្គការ A21 ប្រចាំតំបន់អាស៊ី សហការជាមួយរដ្ឋបាលខេត្តសៀមរាប បានរៀបចំ «កិច្ចប្រជុំកំពូលសកលដើម្បីសេរីភាព (Global Freedom Summit) » ក្នុងគោលបំណងបញ្ជ្រាបការយល់ដឹងដល់សិស្សានុសិស្ស ឪពុកម្ដាយ និងអាណាព្យាបាល អំពីវិធីសាស្ត្រទប់ស្កាត់ និងបង្ការការកេងប្រវ័ញ្ច រួមទាំងការរំលោភបំពានផ្លូវភេទលើកុមារតាមប្រព័ន្ធអនឡាញ។

ដោយមានការចង្អុលបង្ហាញពីសំណាក់ ឯកឧត្តម ប្រាក់ សោភ័ណ អភិបាលខេត្តសៀមរាប កាលពីពេលកន្លងទៅនេះ មន្ទីរសាធារណការ និងដឹកជញ្ជូនខេត្តសៀមរាប បានធ្វើការជួសជុល ថែទាំផ្លូវចំនួន២ខ្សែ ក្នុងស្រុកអង្គរជុំ ដែលបានទទួលរងការខូចខាតដោយជំនន់ទឹកភ្លៀង ដើម្បីបង្កលក្ខណៈងាយស្រួលដល់ប្រជាពលរដ្ឋធ្វើដំណើរឆ្លងកាត់ និងអាស្រ័យផល។

ឆ្លងកាត់ការប្រកួតជាច្រើនប្រកួតរយៈពេលពេញ ២ថ្ងៃ ការប្រកួតកីឡាវាយសីពានរង្វាន់ “ក្រុងអង្គរ” ឆ្នាំ២០២៦ ត្រូវបានបិទបញ្ចប់ដោយជោគជ័យ កាលពីល្ងាចថ្ងៃទី២៥ ខែតុលា ឆ្នាំ២០២៦នេះ ខណៈដែលក្រុមជ័យលាភីបានទៅក្រុមកីឡាករ កីឡាការិនីមកពីខេត្តបាត់ដំបង និងខេត្តសៀមរាបផ្ទាល់។

ថ្លែងក្នុងសិក្ខាសាលាចែករំលែកចំណេះដឹងស្ដីពីរដ្ឋបាលសាធារណៈ និងការគ្រប់គ្រងធនធានមនុស្សនៅកម្ពុជា ដែលរៀបចំឡើងដោយក្រសួងមុខងារសាធារណៈ សហការនឹង KOICA នៅខេត្តសៀមរាប នាថ្ងៃទី២៦ ខែតុលា ឆ្នាំ២០២៦នេះ ឯកឧត្តម យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ និងជានាយកសាលាភូមិន្ទរដ្ឋបាល បានលើកឡើងថា ការលើកកម្ពស់សមត្ថភាពធនធានមនុស្សក្នុងរដ្ឋបាលសាធារណៈ ត្រូវបានរាជរដ្ឋាភិបាលកំណត់ជា «មុំទី២ នៃស្នូល» យ៉ាងមានសារៈសំខាន់នៅក្នុងយុទ្ធសាស្ត្របញ្ចកោណ ដែលជាត្រីវិស័យសម្រាប់ដឹកនាំ និងអភិវឌ្ឍប្រទេសជាតិឆ្ពោះទៅរកចក្ខុវិស័យឆ្នាំ២០៥០។

មន្ត្រីជាន់ខ្ពស់ក្រសួងអប់រំ យុវជន និងកីឡា បានលើកទឹកចិត្តដល់គណៈគ្រប់គ្រងសាលា លោកគ្រូ អ្នកគ្រូ និងសិស្សានុសិស្ស ឱ្យបន្តយកចិត្តទុកដាក់ខ្ពស់លើការលើកកម្ពស់គុណភាពអប់រំ ការពង្រឹងវិន័យសាលារៀន និងការបង្កើនប្រសិទ្ធភាពនៃការបង្រៀននិងរៀន ដើម្បីឆ្លើយតបទៅនឹងការអភិវឌ្ឍវិស័យអប់រំជាតិ។

ថ្លែងក្នុងពិធីប្រគល់សញ្ញាបត្រជូនដល់និស្សិតសាកលវិទ្យាល័យបៀលប្រាយ (BBU) សាខាខេត្តសៀមរាប បាត់ដំបង និងខេត្តបន្ទាយមានជ័យ នៅថ្ងៃទី២៥ ខែតុលា ឆ្នាំ២០២៦នេះ ឯកឧត្តមបណ្ឌិត អ៊ីន វីរជាតិ រដ្ឋលេខាធិការទីស្ដីការគណៈរដ្ឋមន្ត្រី បានមានប្រសាសន៍លើកឡើងថា ការវិនិយោគលើវិស័យអប់រំ និងកសាងមូលធនមនុស្ស ត្រូវបានចាត់ទុកថាជាផ្នែកមួយយ៉ាងសំខាន់ក្នុងការជំរុញ និងលើកកម្ពស់សេដ្ឋកិច្ចជាតិយើងឱ្យកាន់តែប្រសើរឡើង។