ព័ត៌មានក្នុងខេត្ត

នៅថ្ងៃទី២៩ ខែកក្កដា ឆ្នាំ២០២៦ លោក លី សារី អភិបាលរងខេត្តសៀមរាប បានចូលរួមដាំកូនឈើក្ងោកចំនួន ២ ៥០០ដើម តាមបណ្ដោយដងផ្លូវបេតុង “ភ្នំពេជ្រ” ស្ថិតក្នុងភូមិវាល សង្កាត់ជ្រាវ ក្រុងសៀមរាប ដោយរៀបចំ និងឧបត្ថម្ភដោយភោជនីយដ្ឋាន ឡាហ្គូន និងមានការសហការចូលរួមដាំពីភោជនីយដ្ឋាន តាវ៉ឺន សៀមរាប និងភោជនីយដ្ឋាន ឈូកមាស ដោយមានការអញ្ជើញចូលរួមតំណាងមន្ទីរបរិស្ថាន អាជ្ញាធរសង្កាត់ជ្រាវ រួមនិងប្រជាការពារ។

ក្នុងន័យដើម្បីជមរុញការផ្ដល់សេវាជូនប្រជាពលរដ្ឋឱ្យកាន់តែល្អ និងងាយស្រួល លឿន រហ័ស ការិយាល័យប្រជាពលរដ្ឋខេត្តសៀមរាប កាលពីថ្ងៃទី២៧ ខែកក្កដា ឆ្នាំ២០២៦ បានចុះផ្សព្វផ្សាយអនុក្រឹត្យស្ដីពីតួនាទី ភារកិច្ច និងសមត្ថកិច្ចរបស់ការិយាល័យប្រជាពលរដ្ឋរាជធានីខេត្ត និងរបៀបប្រើប្រាស់កម្មវិធីទូរស័ព្ទដៃ “មតិយើង” ជូនដល់អាជ្ញាធរ និងប្រជាពលរដ្ឋ ក្នុងមូលដ្ឋានស្រុកស្រីស្នំ ក្រោមការចង្អុលបង្ហាញរបស់ ឯកឧត្តម លី សំរិទ្ធ ប្រធានក្រុមប្រឹក្សាខេត្ត និងគោលការណ៍ឯកភាពរបស់ ឯកឧត្តម ប្រាក់ សោភ័ណ អភិបាលខេត្ត។

ដោយទឹកចិត្តជ្រះថ្លាក្នុងព្រះពុទ្ធសាសនា នៅថ្ងៃទី២៨ ខែកក្កដា ឆ្នាំ២០២៦ មហាឧបាសក ចន្ទថោង សិរី្យ និងបងប្អូនកូនចៅ បាននាំយកនូវបច្ច័យ និងទេយ្យទានជាអង្ករចំនួន ៥តោន ប្រគេនដល់ព្រះគ្រូ នឿម វុទ្ធី ចៅអធិការវត្តស្វាយរមៀត ដើម្បីចាត់ចែងទ្រទ្រង់ចង្ហាន់ដល់ព្រះសង្ឃដែលគង់ចាំព្រះវស្សា និងស្នាក់នៅសិក្សារៀនសូត្រ ក្នុងអំឡុងពេល៣ខែ នៃការចូលព្រះវស្សាដែលជាពេលវេលាព្រះសង្ឃត្រូវគង់ព្រះវស្សាដើម្បីប្រតិបត្តិធម៌ និងសិក្សារៀនសូត្រព្រះធម៌។

នៅថ្ងៃទី២៨ ខែកក្កដា ឆ្នាំ២០២៦ សម្ភារអេឡិចត្រូនិកសម្រាប់ថ្នាក់រៀនភាសាចិនតាមប្រព័ន្ធអនឡាញ និងសម្ភារសិក្សាមួយចំនួនទៀត ជាជំនួយរបស់ក្រុមយុវជនស្ម័គ្រចិត្តក្រុងធានជីង ប្រទេសចិន ត្រូវបានផ្តល់ជូនសមាគមអ្នកស្រាវជ្រាវវឌ្ឍនភាពកម្ពុជា-ចិន សម្រាប់ផ្តល់បន្តដល់បណ្ដាសាលាក្នុងក្រុងរុនតាឯកតេជោសែន ក្នុងគោលបំណងគាំទ្រការអភិវឌ្ឍវិស័យអប់រំភាសាចិននៅកម្ពុជា និងលើកកម្ពស់ការផ្សារភ្ជាប់ទំនាក់ទំនងរវាងប្រជាជននៃប្រទេសទាំងពីរ។

ថ្លែងបិទវគ្គបណ្តុះបណ្តាលគ្រូបឋមសិក្សា១២+២ ជំនាន់ទី៤០ នៃសាលាគរុកោសល្យ និងវិក្រឹតការខេត្តសៀមរាប នាថ្ងៃទី២៨ ខែកក្កដា ឆ្នាំ២០២៦ លោកស្រី ម៉ននី រង្សី អភិបាលរងខេត្ត បានជំរុញដល់លោកគ្រូអ្នកគ្រូ ប្អូនៗគរុសិស្ស ត្រូវខិតខំប្រឹងប្រែងយកចិត្ត ទុកដាក់អភិវឌ្ឍគុណវុឌ្ឍិ និងអភិវឌ្ឍវិជ្ជាជីវៈជាប្រចាំ ដើម្បីឆ្លើយតបទៅនឹងយុទ្ធសាស្រ្តកំណែទម្រង់វិស័យអប់រំ និងលើកកម្ពស់ឱកាសសិក្សាពេញមួយជីវិតសម្រាប់ទាំងអស់គ្នា។

ថ្លែងបើកវេទិកាសន្ទនាសង្គម ស្ដីពីឆ្ពោះទៅការងារសមរម្យ និងគាំពារសង្គមសម្រាប់កម្មករសេដ្ឋកិច្ចក្រៅប្រព័ន្ធ និងសហគ្រាសធុនតូច និងមធ្យម នាថ្ងៃទី២៨ ខែកក្កដា ឆ្នាំ២០២៦ នៅខេត្តសៀមរាប ឯកឧត្តម គួច សុមាន រដ្ឋលេខាធិការក្រសួងការងារ បានលើកទឹកចិត្តដល់បងប្អូនជាអ្នកកំពុងប្រកបមុខរបរ និងការងារសេដ្ឋកិច្ចក្រៅប្រព័ន្ធ ងាកមកចាប់ឱកាសការងារក្នុងប្រព័ន្ធទាំងអស់គ្នា ព្រោះការទៅចាប់ឱកាសការងារក្នុងប្រព័ន្ធ គឺដើម្បីទទួលបាននូវអត្ថប្រយោជន៍កាន់តែប្រសើរពីរបបសន្តិសុខសង្គម (ប.ស.ស.)។

នារសៀលថ្ងៃទី២៧ ខែកក្កដា ឆ្នាំ២០២៦ គណៈកម្មាធិការលទ្ធកម្មឃុំត្រីញ័រ ស្រុកពួក ខេត្តសៀមរាប បានប្រកាសបិទបញ្ចប់ការដេញថ្លៃដោយជោគជ័យ នូវគម្រោងសាងសង់ផ្លូវដីសក្រាលគ្រួសធម្មជាតិ ៥ខ្សែ នៅក្នុងឃុំ ដោយមានការចូលរួមពីមន្រ្តីបច្ចេកទេសនៃរដ្ឋបាលខេត្ត អាជ្ញាធរស្រុក គណៈកម្មាធិការលទ្ធកម្មឃុំ ក្រុមហ៊ុនម៉ៅការ និងអ្នកសារព័ត៌មាន។

នៅថ្ងៃទី២៧ ខែកក្កដា ឆ្នាំ២០២៦ គណៈកម្មាធិការលទ្ធកម្មឃុំកែវពណ៌ ស្រុកពួក ខេត្តសៀមរាប បានប្រកាសបញ្ចប់ការដេញថ្លៃដោយជោគជ័យ នូវគម្រោងសាងសង់ផ្លូវដីសក្រាលគ្រួសធម្មជាតិ ៥ខ្សែ ដោយការដេញថ្លៃនេះមានការចូលរួមពីមន្ត្រីបច្ចេកទេសនៃរដ្ឋបាលខេត្ត អាជ្ញាធរស្រុក គណៈកម្មាធិការលទ្ធកម្មឃុំ ក្រុមហ៊ុនម៉ៅការ និងអ្នកសារព័ត៌មាន។

ថ្លែងក្នុងកម្មវិធីសន្ទនាមតិ របស់វិទ្យុ និង ទូរទស្សន៍ជាតិខេត្តសៀមរាប កាលពីថ្ងៃទី២១ ខែកក្កដា ឆ្នាំ២០២៦ លោកវរសេនីយ៍ឯក អ៊ុន ស្រស់ អធិការនគរបាលស្រុកស្រីស្នំ មានប្រសាសន៍ថា អធិការដ្ឋាននគរបាលស្រុក បាននិងកំពុងបន្តពង្រឹងការអនុវត្តគោលនយោបាយ «ភូមិ ឃុំ-សង្កាត់មានសុវត្ថិភាព» ដើម្បីបង្កើនសន្ដិសុខសណ្ដាប់ធ្នាប់ និង ផ្ដល់ភាពងាយស្រួលដល់ការរស់នៅរបស់ប្រជាពលរដ្ឋក្នុងមូលដ្ឋាន។

វិស័យទេសចរណ៍ និងការងារជួញដូរ គឺជាកត្តាមិនអាចកាត់ផ្ដាច់ពីគ្នាបានឡើយ ស្របពេលដែលពិភពលោកកំពុងមានការវិវត្តយ៉ាងលឿនរហ័ស ហើយសកម្មភាពជួញដូរមិនត្រឹមតែប្រព្រឹត្តឡើងតាមរយៈការជួញដូរដោយផ្ទាល់ប៉ុណ្ណោះទេ ប៉ុន្តែថែមទាំងបានឆ្លងកាត់ប្រព័ន្ធអនឡាញ (Online) ផងដែរ ដែលទាមទារឱ្យភាគីពាក់ព័ន្ធទាំងអស់ត្រូវបង្កើនការយល់ដឹង និងតាមដានឱ្យបានស៊ីជម្រៅពីបញ្ហានេះ។

ការអភិវឌ្ឍធនធានមនុស្សប្រកបដោយគុណភាព សមត្ថភាព និងគុណធម៌ គឺជាកត្តាគន្លឹះសម្រាប់ទ្រទ្រង់កំណើនសេដ្ឋកិច្ច និងភាពប្រកួតប្រជែងរបស់ប្រទេស ទាំងក្នុងពេលចំពោះមុខ និងសម្រាប់អនាគត ជាពិសេសគឺក្នុងពេលដែលកម្ពុជាបន្តបោះជំហានឆ្ពោះទៅសម្រេចចក្ខុវិស័យក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសអភិវឌ្ឍន៍នៅឆ្នាំ២០៥០។

អាជ្ញាធរខេត្តសៀមរាប បានអំពាវនាវដល់ថ្នាក់ដឹកនាំគ្រប់មន្ទីរអង្គភាព រដ្ឋបាលក្រុងស្រុក និងវិស័យឯកជនទាំងអស់ ឱ្យចូលរួមបំផុសចលនាកីឡានៅទូទាំងខេត្តឱ្យបានទូលំទូលាយ ដើម្បីលើកកម្ពស់សុខភាព សាមគ្គីភាព និងជួយឱ្យមន្ត្រីរាជការព្រមទាំងប្រជាពលរដ្ឋមានកាយសម្បទារឹងមាំ ជៀសឆ្ងាយពីជំងឺ និងគ្រឿងញៀន ជាពិសេសជួយពង្រឹងទំនាក់ទំនងល្អ និងកិច្ចសហការការងារតាមរយៈសកម្មភាពកីឡារួមគ្នាផងដែរ។