ព័ត៌មានក្នុងខេត្ត

ការចិញ្ចឹមជ្រូកជាលក្ខណៈគ្រួសារ ជាមុខរបរបន្ទាប់ពីការធ្វើស្រែចម្ការ របស់លោកស្រី ហ៉ិន គៅ ដែលលោកស្រីបានចាប់យកការចិញ្ចឹមជ្រូកជាលក្ខណៈគ្រួសារនេះ មានរយៈពេលយូរមកហើយ ដោយបច្ចុប្បន្នការចិញ្ចឹមនេះ មានចំនួនមេជ្រូកពូជចាស់ក្មេង ៧ក្បាល និងជ្រូកសាច់ចំនួន១២ក្បាល។

‎ក្នុងកិច្ចប្រជុំបូកសរុបលទ្ធផលការងារប្រចាំខែសីហា និងលើកទិសដៅការងារបន្តរបស់ក្រុមការងាររាជរដ្ឋាភិបាលចុះមូលដ្ឋានស្រុកអង្គរធំ នៅរសៀលថ្ងៃទី១ ខែកញ្ញា ឆ្នាំ២០២៦ ឯកឧត្តម ឧត្តមសេនីយ៍ទោ ម៉ក់ សីហា អនុប្រធានក្រុមការងាររាជរដ្ឋាភិបាលចុះមូលដ្ឋានស្រុកអង្គរធំ បានជំរុញដល់ក្រុមការងារទាំងអស់ បន្ដអនុវត្ដកិច្ចការបន្ថែមទៀតក្រៅអំពីកិច្ចការងារស្នូលដែលយើងបំពេញរាល់ថ្ងៃ ដើម្បីអភិវឌ្ឍន៍មូលដ្ឋានស្រុកអង្គរធំ ឱ្យមានការរីកចម្រើនលើគ្រប់វិស័យបន្ថែមទៀត ដែលនេះជាផ្នែកមួយក្នុងការបង្ហាញនូវការជឿទុកចិត្ដលើការអនុវត្ដការងាររបស់យើងពីសំណាក់ប្រជាពលរដ្ឋ។

ថ្លែងបើកកិច្ចប្រជុំបូកសរុបលទ្ធផលការងារប្រចាំខែសីហា ឆ្នាំ២០២៦ របស់លេខាធិការដ្ឋាន គណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប (គ.ខ.ប.ជ) នៅថ្ងៃទី១ ខែកញ្ញា ឆ្នាំ២០២៦នេះ លោកស្រី ម៉ននី រង្សី អភិបាលរងខេត្ត និងជាអនុប្រធានអចិន្ត្រៃយ៍ទទួលបន្ទុកជាប្រធានលេខាធិការដ្ឋាន គ.ខ.ប.ជ បានជំរុញឱ្យអាជ្ញាធរមានសមត្ថកិច្ច និងមន្ទីរអង្គភាពពាក់ព័ន្ធ ត្រូវបង្កើនការត្រួតពិនិត្យ និងចាត់វិធានការម៉ឺងម៉ាត់ចំពោះសហគ្រាស ឬម្ចាស់អាជីវកម្មទាំងឡាយណាដែលបានប្រើប្រាស់កម្លាំងពលកម្មកុមារដោយគ្មានការអនុញ្ញាត ឬនាំយកកុមារទៅបម្រើសេវាកម្មនៅតាមទីតាំងប្រឈម ដូចជា ក្លិប ខារ៉ាអូខេ (KTV) និងអាជីវដ្ឋានផ្សេងៗ សំដៅការពារសិទ្ធិ និងសុខុមាលភាពរបស់កុមារឱ្យបានទាន់ពេលវេលា។

វេទិកាផ្លាស់ប្តូរចំណេះដឹងស្តីពីអភិបាលកិច្ចមូលដ្ឋានប្រកបដោយបរិយាបន្ន និងភាពជាអ្នកដឹកនាំរបស់ស្ត្រី នៃគម្រោងភាពជាដៃគូសម្រាប់គំនិតច្នៃប្រឌិតរបស់ទីក្រុងលើការដឹកនាំរបស់ស្ត្រីនៅមូលដ្ឋាន (PMI-WILL) ត្រូវបានរៀបចំពិធីបិទបញ្ចប់នៅខេត្តសៀមរាប នាថ្ងៃទី០១ និងទី០២ ខែកញ្ញា ឆ្នាំ២០២៦ បន្ទាប់ពីបានអនុវត្តយ៉ាងសកម្មអស់រយៈពេល ៦ ឆ្នាំ។

‎នៅព្រឹកថ្ងៃទី១ ខែកញ្ញា ឆ្នាំ២០២៦ នៅសាលាស្រុកអង្គរធំ ខេត្តសៀមរាប ឯកឧត្តមឧត្តមសេនីយ៍ទោ ម៉ក់ សីហា អនុប្រធានស្ថាប័នអយ្យការយោធា និងឯកឧត្តមឧត្តមសេនីយ៍ទោ គង្គ ប៊ុនធឿន នាយករងនាយកដ្ឋានប្រេងឥន្ធនៈ បានរៀបចំកិច្ចប្រជុំផ្សព្វផ្សាយសារៈសំខាន់នៃការអនុវត្តច្បាប់ស្ដីពីកាតព្វកិច្ចយោធា ដើម្បីធានាឱ្យការអនុវត្តច្បាប់ប្រព្រឹត្តទៅដោយប្រសិទ្ធភាព ត្រឹមត្រូវ និងទាន់ពេលវេលា និងការពិនិត្យទិន្នន័យប្រជាពលរដ្ឋ ព្រមទាំងផ្សព្វផ្សាយអំពីច្បាប់ស្តីពីកាតព្វកិច្ចយោធា និងសេចក្តីណែនាំរបស់រាជរដ្ឋាភិបាល ស្តីពីការបំផុសចលនាយុទ្ធនាការអនុវត្តច្បាប់ស្តីពីកាតព្វកិច្ចយោធា។

‎នៅថ្ងៃទី១ ខែកញ្ញា ឆ្នាំ២០២៦នេះ លោក លី សារី អភិបាលរងខេត្តសៀមរាប បានដឹកមន្ត្រីនៃមន្ទីរជំនាញពាក់ព័ន្ធ ចុះធ្វើការណែនាំ និងធ្វើកិច្ចសន្យាដល់ម្ចាស់ទីតាំងមួយដែលបានដាក់តាំងលក់សម្លៀកបំពាក់មួយចំនួនក្នុងក្រុងសៀមរាប ដែលមានភ្ជាប់ជាមួយនូវពាក្យអសុរោះ និងមិនគួរគប្បី ដែលវាអាចជះឥទ្ធិពលអវិជ្ជមានដល់សង្គមជាតិ មិនតែប៉ុណ្ណោះថែមទាំងទាញឱ្យគុណតម្លៃអក្សរសាស្ដ្រជាតិធ្លាក់ចុះផងដែរ។ ‎

‎នៅថ្ងៃទី៣០ ខែសីហា ឆ្នាំ២០២៦ អាជ្ញាធរសង្កាត់ស្រង៉ែ សង្កាត់ស្លក្រាម សង្កាត់គោកចក និង សង្កាត់សាលាកំរើក ក្រុងសៀមរាប រួមជាមួយនឹងសប្បុរសជន បាននាំយកនូវគ្រឿងឧបភោគបរិភោគ សម្ភារប្រើប្រាស់ចាំបាច់ ជូនដល់កងទ័ពជួរមុខក្នុងខេត្តឧត្តរមានជ័យ ។ ‎

‎ឯកសារវិនិច្ឆ័យដីធ្លីចំនួន ៦ ៧៩៦ ក្បាលដី ក្នុងភូមិទាំង៧ នៃឃុំក្តីរុន ស្រុកពួក ខេត្តសៀមរាប ត្រូវបានបិទផ្សាយជាសាធារណៈ ដើម្បីឱ្យប្រជាពលរដ្ឋ រួមនឹងអ្នកពាក់ព័ន្ធចូលរួមពិនិត្យ ផ្ទៀងផ្ទាត់ និងស្នើសុំកែតម្រូវ ក្នុងពិនិត្យឃើញមានកំហុសឆ្គង ដែលការបិទផ្សាយនេះជាឱកាសចុងក្រោយដែលអាចកែតម្រូវ មានរយៈពេល ១៥ថ្ងៃ ចាប់ពីថ្ងៃទី៣១ ខែសីហា ដល់ទី១៤ ខែកញ្ញា ឆ្នាំ២០២៦ នៅក្នុងបរិវេណវត្តក្តីរុនរង្សី។

‎ឯកសារនៃការវិនិច្ឆ័យដីធ្លីមានលក្ខណៈជាប្រព័ន្ធចំនួន ៧ ៦៩២ ក្បាលដី ស្ថិតក្នុងភូមិទាំង៦ នៃឃុំមុខប៉ែន ស្រុកពួក ខេត្តសៀមរាប ត្រូវបានមន្ត្រីជំនាញបិទផ្សាយជាសាធារណៈ ដើម្បីឱ្យប្រជាពលរដ្ឋ និងអ្នកពាក់ព័ន្ធចូលរួមពិនិត្យ និងផ្ទៀងផ្ទាត់ទិន្នន័យឱ្យបានគ្រប់ៗគ្នា ដែលធានាបាននូវភាពត្រឹមត្រូវមុននឹងចេញបណ្ណកម្មសិទ្ធិ។

‎អាជ្ញាធរខេត្តសៀមរាប បានលើកឡើងថា ការប្រកាសតែងតាំងសមាសភាពគណៈអ៊ីម៉ាំខេត្តនាពេលនេះ គឺជាសញ្ញាណបង្ហាញពីការពង្រឹងរចនាសម្ព័ន្ធដឹកនាំសាសនា ការរឹតចំណងសាមគ្គីភាព និងការបន្តបេសកកម្មបម្រើសហគមន៍ឥស្លាមនៅក្នុងខេត្តឱ្យកាន់តែមានប្រសិទ្ធភាពបន្ថែមទៀត។

ព្រឹត្ដិការណ៍រត់កម្សាន្ដជាមួយកងរាជអាវុធហត្ថខេត្ដសៀមរាប នៅថ្ងៃទី៣០ ខែសីហា ឆ្នាំ២០២៦  ក្មុងគោលបំំណង ថែទាំសុខភាព កាយសម្បទា រហ័សរហួន ព្រមទាំងគ្រប់គ្រងនូវកាយសម្បទាកងកម្លាំងឱ្យ រឹងមាំ និងមានប្រសិទ្ធភាពខ្ពស់  ក្នុងការងារប្រតិបត្តិការ លើកការបង្កាបង្ក្រាបនូវរាល់បទល្មើស និង អន្តរាគមន៍សង្គ្រោះ ដែលព្រឹត្ដិការណ៍នេះមានអ្នកចូលរួមរត់ចំនួន ៥ពាន់៥៩២នាក់ ក្នុងនោះចម្ងាយ ៥,៥គីឡូម៉ែត្រ។

នាថ្ងៃទី២៩ ខែសីហា ឆ្នាំ២០២៦ កម្មវិធីពិព័រណ៍ «សារមន្ទីរស្ថាបនិកសេរីភាព២៥០» (Freedom 250 Founders Museum) ត្រូវបានសម្ពោធដាក់ឱ្យដំណើរការជាផ្លូវការ នៅមជ្ឈមណ្ឌល American Corner នៃសាកលវិទ្យាល័យ សៅស៍អ៊ីសថ៍អេសៀ (USEA) ខេត្តសៀមរាប ដើម្បីអបអរសាទរខួបអនុស្សាវរីយ៍លើកទី២៥០ នៃទិវាបុណ្យឯករាជ្យជាតិរបស់សហរដ្ឋអាមេរិក។ ពិធីនេះបានប្រព្រឹត្តទៅក្រោមវត្តមានអញ្ជើញចូលរួមពី លោកស្រី Cate Dillon ឧបការីរដ្ឋមន្ត្រីការបរទេសអាមេរិក ទទួលបន្ទុកកិច្ចការអប់រំ និងវប្បធម៌ ឯកឧត្ដម លី សំរិទ្ធ ប្រធានក្រុមប្រឹក្សាខេត្តសៀមរាប លោក លី សារី អភិបាលរងខេត្ត និងលោកបណ្ឌិត មាស សុធី សាកលវិទ្យាធិការនៃសាកលវិទ្យាល័យ សៅស៍អ៊ីសថ៍អេសៀ។