ព័ត៌មានក្នុងខេត្ត

រដ្ឋបាលខេត្តសៀមរាប និងមន្ទីរផែនការខេត្ត នៅថ្ងៃទី២៩ ខែមិថុនា ឆ្នាំ២០២៦នេះ បានរៀបចំវគ្គបណ្តុះបណ្តាលពង្រឹងសមត្ថភាពដល់មន្ត្រីបច្ចេកទេស និងមន្ត្រីមកពីមន្ទីរអង្គភាពជុំវិញខេត្ត ស្ដីពីការវិភាគស្ថានភាពសម្រាប់រៀបចំកម្មវិធីវិនិយោគ ៣ឆ្នាំរំកិលខេត្ត ឆ្នាំ២០២៧-២០២៩ ដើម្បីពង្រឹងចំណេះដឹង និងជំនាញដល់មន្ត្រី ដើម្បីធានាបាននូវការរៀបចំផែនការអភិវឌ្ឍន៍ និងកម្មវិធីវិនិយោគប្រកបដោយគុណភាព ប្រសិទ្ធភាព និងភាពច្បាស់លាស់ ស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល។

ព័ត៌មានបឋម៖ នាព្រឹកថ្ងៃទី២៩ ខែមិថុនា ឆ្នាំ២០២៦នេះ រដ្ឋបាលខេត្តសៀមរាប បានបើកកិច្ចប្រជុំសាមញ្ញលើកទី៤ វេទិកាទីក្រុងឆ្លាតសៀមរាប នៃគម្រោងទីក្រុងឆ្លាតវៃ ខេត្តសៀមរាប ក្រោមអធិបតីភាព ឯកឧត្តម អ៊ុំ ម៉ារ៉ា រដ្ឋលេខាធិការក្រសួងមហាផ្ទៃ និងជាប្រធានគណៈកម្មការសម្របសម្រួល និងដឹកនាំការងារទីក្រុងឆ្លាត លោក សំកុល សុចិត្រា អភិបាលរងខេត្ត ដោយមានការចូលរួមពីមន្ទីរ ស្ថាប័នរដ្ឋ វិស័យឯកជន និងភាគីពាក់ព័ន្ធ។

ព័ត៌មានបឋម៖ អាជ្ញាធរខេត្តសៀមរាប ប្រកាសដាក់ឱ្យដំណើរការបិទផ្សាយជាសាធារណៈនូវឯកសារនៃការវិនិច្ឆ័យដីធ្លីមានលក្ខណៈជាប្រព័ន្ធចំនួន១៣,៣៧៤ ក្បាលដី ស្ថិតក្នុងភូមិទាំង១២ នៃឃុំចន្លាស់ដៃ ស្រុកក្រឡាញ់ ខេត្តសៀមរាប។ ពិធីនេះបានប្រព្រឹត្តទៅក្រោមអធិបតីភាព ឯកឧត្ដម សួស សុខចាន់ សមាជិកក្រុមប្រឹក្សាខេត្ត លោក ហែន ពុទ្ធី អភិបាលរងខេត្ត ថ្នាក់ដឹកនាំមន្ទីអង្គភាព និងបងប្អូនប្រជាពលរដ្ឋមូលដ្ឋានជាច្រើនរូប។ រូបភាព៖ លោក ឡៃ បញ្ញា

នាព្រឹកថ្ងៃ២៩ ខែមិថុនា ឆ្នាំ២០២៦ គណៈកម្មការរដ្ឋបាលខេត្ត និងមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បានសហការជាមួយរដ្ឋបាលស្រុក រៀបចំពិធីប្រកាសបិទផ្សាយជាសាធារណៈនូវឯកសារវិនិច្ឆ័យ នៅបរិវេណវត្តគគីរ ឃុំកន្រ្ទាំង ស្រុកប្រាសាទបាគង ដែលមានការចុះបញ្ជីដីធ្លីមានលក្ខណៈជាប្រព័ន្ធ ដើម្បីឱ្យប្រជាពលរដ្ឋជាម្ចាស់ដី និងអ្នកពាក់ព័ន្ធ ចូលរួមពិនិត្យ ផ្ទៀងផ្ទាត់ និងកែតម្រូវព័ត៌មានឱ្យបានត្រឹមត្រូវ មុនពេលចេញបណ្ណកម្មសិទ្ធិជូនដល់ពលរដ្ឋ។ ពិធីនេះដែលក្រោមអធិបតីភាពឯកឧត្តម ឡុក ឡងឌី សមាជិកក្រុមប្រឹក្សាខេត្ត លោក ឌី រ៉ាដូ អភិបាលរងខេត្ត និង មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត អាជ្ញាធរមូលដ្ឋាន និងអង្គភាពពាក់ព័ន្ធជាច្រើនរូបផងដែរ៕ រូបភាព ៖ លោក ឆាន ញ្ញា

មន្ត្រីជាន់ខ្ពស់ក្រសួងសាធារណការ និងដឹកជញ្ជូន បានបង្ហាញថា គ្រោះថ្នាក់ចរាចរណ៍មិនត្រឹមតែបង្កការខូចខាតដល់ជីវិត និងទ្រព្យសម្បត្តិបុគ្គលប៉ុណ្ណោះទេ ប៉ុន្តែថែមទាំងជាបន្ទុកដ៏ធ្ងន់ធ្ងរដល់គ្រួសារ និងប៉ះពាល់ដល់ការអភិវឌ្ឍសង្គមជាតិទាំងមូល ប្រការនេះ ទាមទារឱ្យអ្នកប្រើប្រាស់ផ្លូវទាំងអស់ ត្រូវចូលរួមគោរពច្បាប់ចរាចរណ៍ឱ្យបានគ្រប់ៗគ្នា និងគ្រប់ពេលវេលា ដើម្បីកាត់បន្ថយគ្រោះថ្នាក់ចរាចរណ៍ឱ្យមកនៅក្នុងកម្រិតទាបបំផុត។

ក្នុងឱកាសដឹកនាំកិច្ចប្រជុំក្រុមការងារពិសេសលុបបំបាត់ជំងឺគ្រុនចាញ់ថ្នាក់ខេត្ត ប្រចាំត្រីមាសទី២ ឆ្នាំ២០២៦ នៅថ្ងៃទី២៦ ខែមិថុនា ឆ្នាំ២០២៦នេះ លោក នាក់ ណេរ៉ុន អភិបាលរងខេត្តសៀមរាប ណែនាំឱ្យក្រុមការងារពាក់ព័ន្ធក្នុងខេត្ត ត្រូវពង្រឹងយន្តការ និងដាក់ចេញវិធានការបន្ទាន់ ក្នុងគោលបំណងធានាបាននូវប្រសិទ្ធភាពក្នុងការទប់ស្កាត់ និងឆ្ពោះទៅរកការលុបបំបាត់ជំងឺគ្រុនចាញ់ក្នុងខេត្តសៀមរាបទាំងស្រុង ដើម្បីឈានទៅស្នើសុំវិញ្ញាបនបត្របញ្ជាក់ការលុបបំបាត់ជំងឺគ្រុនចាញ់ពីក្រសួងសុខាភិបាល។

ព្រឹត្តិការណ៍ទេសចរណ៍បរិស្ថានប្រចាំឆ្នាំ និងបុណ្យដឹងគុណបឹងទន្លេសាប ក្រោមប្រធានបទ «ទស្សនាភូមិភាគបៃតងនៃកម្ពុជា នៅសហគមន៍កំពង់ឃ្លាំង» ត្រូវបានប្រារព្ធឡើងជាផ្លូវការ នៅបរិវេណកំពង់ចម្លងទូកទេសចរណ៍ ឃុំកំពង់ឃ្លាំង ស្រុកសូទ្រនិគម ខេត្តសៀមរាប នៅរសៀលថ្ងៃទី២៦ ខែមិថុនា ឆ្នាំ២០២៦នេះ ដើម្បីលើកកម្ពស់សក្ដានុពលទេសចរណ៍ធម្មជានៅរដូវវស្សា (Green Season) បំផុសចលនាថែរក្សាបរិស្ថាន និងជំរុញជីវភាពប្រជាសហគមន៍។

នៅរសៀលថ្ងៃទី២៦ ខែមិថុនា ឆ្នាំ២០២៦ លោក សុខ ថុល អភិបាលរងខេត្តសៀមរាប តំណាងដ៏ខ្ពង់ខ្ពស់របស់ ឯកឧត្តម ប្រាក់ សោភ័ណ អភិបាលខេត្ត បានដឹកនាំថ្នាក់ដឹកនាំខេត្តមន្ទីរអង្គភាពពាក់ព័ន្ធ ជួបពិភាក្សាការងារជាមួយក្រុមជំនាញបេសកកម្មនៃមូលនិធិរូបិយវត្ថុអន្តរជាតិ (IMF) ដឹកនាំដោយលោក Jochen M.Schmittman ប្រធានក្រុមជំនាញ IMF Article IV ដើម្បីពិនិត្យលើស្ថានភាពសេដ្ឋកិច្ចក្នុងខេត្តសៀមរាប។

មន្ត្រីជាន់ខ្ពស់ក្រសួងអប់រំ យុវជន និងកីឡា បានលើកទឹកចិត្តដល់មន្ទីរអប់រំខេត្តសៀមរាប និងខេត្តពាក់ព័ន្ធដទៃទៀត បន្តជំរុញ គាំទ្រការអនុវត្តកម្មវិធីសួនសិក្សា និងផ្ទះបាយសិក្សា តាមរយៈការប្រើប្រាស់ឯកសារជំនួយសម្រាប់ការដឹកនាំ បង្រៀន ដែលបានអនុញ្ញាតដាក់ឱ្យប្រើប្រាស់នាពេលកន្លងមក ដើម្បីជាប្រយោជន៍ និងលើកកម្ពស់លទ្ធផលសិក្សារបស់សិស្សានុសិស្ស ព្រោះសមិទ្ធផលទាំងនេះជាទ្រព្យដែលមិនអាចកាត់ថ្លៃបានរបស់សាលារៀន សហគមន៍ ដែលនឹងជួយផ្លាស់ប្តូរអនាគតរបស់កុមារកម្ពុជាយើង។

ក្រោយបញ្ចប់កិច្ចប្រជុំប្រចាំឆ្នាំថ្នាក់អគ្គនាយកអន្តោប្រវេសន៍ និងប្រធានកុងស៊ុលអាស៊ាន (DGICM) លើកទី២៩ និងកិច្ចប្រជុំពាក់ព័ន្ធ នៅរសៀលថ្ងៃទី២៥ ខែមិថុនា ឆ្នាំ២០២៦ ឯកឧត្តម ឧត្តមសេនីយ៍ឯក សុខ វាសនា អគ្គនាយកនៃអគ្គនាយកដ្ឋានអន្តោប្រវេសន៍ នៃក្រសួងមហាផ្ទៃកម្ពុជា បានបញ្ជាក់ពីភាពជោគជ័យនៃកិច្ចប្រជុំរយៈពេល៣ថ្ងៃនេះ តាមរយៈមានការគាំទ្រ និងឯកភាពរួមគ្នា ទប់ស្កាត់បទល្មើសឆ្លងដែនគ្រប់ប្រភេទ រួមមាន៖បទលើ្មសឆបោកតាមប្រព័ន្ធបច្ចេកវិទ្យា ការជួញដូរមនុស្ស ការជួញដូរគ្រឿងញៀនជាដើម។

នាព្រឹកថ្ងៃទី២៦ ខែមិថុនា ឆ្នាំ២០២៦ លេខាធិការដ្ឋាននៃគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប (គ.ខ.ប.ជ) បានរៀបចំកិច្ចប្រជុំបូកសរុបលទ្ធផលការងារប្រចាំត្រីមាសទី២ ឆ្នាំ២០២៦ ដើម្បីលើកឡើងនូវបញ្ហាប្រឈមថ្មីៗដែលបានកើតមានឡើងមកពិភាក្សា ជាពិសេសពាក់ព័ន្ធនឹងល្បិចកលបោកបញ្ឆោតតាមប្រព័ន្ធបច្ចេកវិទ្យា និងការអូសទាញពលករឱ្យធ្វើចំណាកស្រុកដោយប្រថុយប្រថាន។

នៅថ្ងៃទី២៦ ខែមិថុនា ឆ្នាំ២០២៦នេះ លោកស្រី ម៉ននី រង្សី អភិបាលរងខេត្តសៀមរាប តំណាងដ៏ខ្ពង់ខ្ពស់ ឯកឧត្តម ប្រាក់ សោភ័ណ អភិបាលខេត្ត បានអញ្ជើញជាអធិបតីក្នុងពិធីប្រកាសផ្ទេរមុខតំណែង លោកស្រី យង់ ផារី ពីអភិបាលរងស្រុកអង្គរជុំ មកជាអភិបាលរងស្រុកស្នំ និង លោកស្រី ចាន់ សួយ អភិបាលរងស្រុកស្រីស្នំ ទៅជាអភិបាលរងស្រុកក្រឡាញ់។