ព័ត៌មានក្នុងខេត្ត

ឯកឧត្តម ប្រាក់ សោភ័ណ ចាត់ក្រុមការងារនាំយកអំណោយជាគ្រឿងឧបភោគ បរិភោគ និងថវិកា ជូនបងប្អូនភៀសសឹក ៣២២គ្រួសារ នៅស្រុកស្រីស្នំ នៅថ្ងៃទី១២ ខែមិថុនា ឆ្នាំ២០២៦នេះ ឯកឧត្តម ប្រាក់ សោភ័ណ អភិបាលខេត្តសៀមរាប បានចាត់ លោក ង៉ូវ សេងកាក់ អភិបាលរងខេត្ត ដោយមានការចូលរួមពីអាជ្ញាធរស្រុក និងក្រុមការងារ ចុះសួរសុខទុក្ខ និងនាំយកអំណោយជាគ្រឿងឧបភោគ បរិភោគ និងថវិកាមួយចំនួន ជូនដល់បងប្អូនភៀសសឹកដែលកំពុងស្នាក់នៅក្នុងមណ្ឌលវត្តជ្រោយនាងងួន មណ្ឌលវត្តប្រសាទបុទុមោង មណ្ឌលវត្តសុវណ្ណគីរីកេសត្រោះ និងមណ្ឌលវត្តវេឡុវ័ន្តដោកពោយគោកក្រោល ក្នុងស្រុកស្រីស្នំ សរុបចំនួន ៣២២គ្រួសារ។ សម្រាប់អំណោយដែលបានផ្ដល់ជូន ក្នុងមួយគ្រួសារទទួលបាន៖ អង្ករ ២៥គីឡូក្រាម, មី១កេស, ទឹកត្រី១យួរ, ទឹកស៊ីអ៊ីវ១យួរ, ត្រីខ១យួរ និងថវិកា ៤០ម៉ឺនរៀល៕

បងប្អូនគ្រួសារភៀសសឹក ១៧០គ្រួសារ ស្នាក់នៅក្នុងវត្តធម្មរង្សីសំពៅលូន ស្រុកក្រឡាញ់ បានទទួលអំណោយពីអង្គការហេបកូដ តាមរយៈមូលនិធិ Smart Axiata

សហគមន៍ទេសចរណ៍បឹងឈូកបន្ទាយស្រី បានក្លាយពីតំបន់ធម្មជាតិធម្មតា មកជាសហគមន៍ទេសចរណ៍ដ៏ទាក់ទាញសម្រាប់ភ្ញៀវទេសចរ ជាមួយបរិយាកាសធម្មជាតិ ត្រជាក់ស្រស់ស្រាយ ហើយតាមរយៈនេះសហគមន៍ ក៏បាននាំមកនូវប្រាក់ចំណូលជូនប្រជាពលរដ្ឋក្នុងមូលដ្ឋានថែមទៀតផង។ កុំភ្លេចចុងសប្ដាហ៍នេះ ទៅលេងបឹងឈូកបន្ទាយស្រី ទាំងអស់គ្នា!

កាលពីថ្ងៃទី១១ ខែមិថុនា ឆ្នាំ២០២៦ លោកស្រី ម៉ននី រង្សី អភិបាលរងខេត្តសៀមរាប ចូលរួមជាសប្បុរសជនចែកសម្ភារអនាម័យសម្រាប់បងប្អូនភៀសសឹកចំនួន ១៣១គ្រួសារ ស្នាក់នៅមណ្ឌលសុវត្ថិភាពវត្តបូណ៌ខ្នាតេជោ និងវត្តស្រណាល ស្រុកក្រឡាញ់ ដែលរៀបចំឡើងដោយអង្គការ helpcode Cambodia និងមានការឧបត្ថម្ភគាំទ្រពី ក្រុមហ៊ុន Smart Axiata។

នៅព្រឹកថ្ងៃទី១២ ខែមិថុនា ឆ្នាំ២០២៦នេះ សាខាកាកបាទក្រហមកម្ពុជា ខេត្តសៀមរាប បានប្រារព្ធពិធីអបអរសាទរ ព្រះរាជពិធីចម្រើនព្រះជន្មវស្សា សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្ដីថ្លៃថ្នូរ និងសុភមង្គល និងជាព្រះប្រធានកិត្តិយសកាកបាទក្រហមកម្ពុជា គម្រប់ខួប ៩០ព្រះវស្សា យាងចូល ៩១ព្រះវស្សា ដោយបានរៀបចំពិធីសូត្រមន្ត និងប្រគេនទេយ្យទានព្រះសង្ឃ និងចែកអំណោយមនុស្សធម៌ជូនប្រជាពលរដ្ឋងាយរងគ្រោះ ចំនួន៩១គ្រួសារ នៅទីស្នាក់ការអនុសាខាកាកបាទក្រហមកម្ពុជា ក្រុងរុនតាឯកតេជោសែន។

រាជរដ្ឋាភិបាលកម្ពុជាបានដាក់ចេញនូវគោលនយោបាយអភិវឌ្ឍន៍វិស័យកសិកម្ម ដោយផ្តោតលើការបង្កើត និងពង្រឹង សហគមន៍កសិកម្ម ដើម្បីប្រែក្លាយកសិកម្មខ្នាតតូចទៅជាកសិកម្មទំនើប តាមរយៈកម្មវិធីគោលនយោបាយអាទិភាព ជំរុញការផលិតគោលដៅចម្បង គឺកាត់បន្ថយថ្លៃដើមផលិត ធានាទីផ្សារ និងបង្កើនប្រាក់ចំណេញជូនកសិករ ជាពិសេសបានផ្ដល់ឱកាសឱ្យប្រជាពលរដ្ឋក្នុងមូលដ្ឋានមានការងារធ្វើ ក្នុងន័យបង្កើនសេដ្ឋកិច្ចក្នុងមូលដ្ឋាន។

បច្ចុប្បន្នសិប្បកម្មជាលខ្មែរ ដែលផលិតចេញពីវល្លិរពាក់ ឫស្សី ផ្អាវ ស្ថិតក្នុងភូមិទឹកវិល សង្កាត់ទឹកវិល ក្រុង/ខេត្តសៀមរាប កំពុងមានការរីកចម្រើនជាបន្ដបន្ទាប់ តាមរយៈការបញ្ជាទិញពីអតិថិជនពីគ្រប់ទិសទី ក្នុងស្មារតីលើកស្ទួយផលិតផលក្នុងស្រុក ខណៈអាជីវកម្មនេះ បានផ្ដល់ឱកាសការងារដល់ប្រជាពលរដ្ឋក្នុងមូលដ្ឋាន អាចបង្កើនប្រាក់ចំណូលប្រចាំថ្ងៃថែមទៀតផង។

នៅថ្ងៃទី១២ ខែមិថុនា ឆ្នាំ២០២៦ ក្រសួងបរិស្ថាន សហការជាមួយអង្គការដៃគូ បានរៀបចំសិក្ខាផ្សព្វផ្សាយស្ដីពីសូចនាករគន្លឹះពាក់ព័ន្ធនឹងសមភាពយេនឌ័រ និងបរិយាបន្នសង្គមនៃផែនការជាតិរួមចំណែកឆ្លើយតបនឹងការប្រែប្រួលអាកាសធាតុ និងផែនការយុទ្ធសាស្ត្របញ្រ្ជាបយេនឌ័រក្នុងវិស័យបរិស្ថាន ដែលនេះជាការរៀបចំលើកដំបូងក្នុងខេត្តសៀមរាប ដោយមានការចូលរួមពីមន្ត្រីមកពីខេត្តចំនួន១០ រួមមាន ខេត្តឧត្ដរមានជ័យ បន្ទាយមានជ័យ ប៉ៃលិន បាត់ដំបង ពោធិ៍សាត់ កំពង់ឆ្នាំង កំពង់ចាម កំពង់ធំ ព្រះវិហារ និងខេត្តសៀមរាប។

តាម​រយៈទេ​ព​កោ​ស​ល្យ​​គំ​​​នូ​​​រ​​ ​លោ​​​ក​​​ ​​​សិទ្ធ​​​ ​​​ឃ​​ន​​​​​​​​​​​​​​​​​​​​​​​​​​ ​មិន​ត្រឹ​មតែ​ជា​មុ​ខ​រ​ប​រអា​​​​​​​​​​​​​​​​​​ច​រ​ក​ប្រា​ក់ចំ​​ណូល​ប​ន្ថែ​ម​ស​ម្រា​ប់​គ្រួ​សា​រ​ប៉ុ​ណ្ណោះ​ទេ​ ​តែ​ក៏​រួ​ម​ចំ​ណែ​ក​យ៉ា​ង​ស​ក​ម្ម​ក្នុង​កា​រ​អ​ភិ​រ​ក្សសិ​ល្បៈ​ ​និ​ង​នាំ​វប្ប​ធ​ម៌​ខ្មែ​រ​ឱ្យ​ពិ​ភព​លោ​ក​បា​ន​ស្គា​​ល់

ផ្ទះមនុស្សធម៌ ២ខ្នង ជាអំណោយរបស់ អ្នកឧកញ៉ា វ៉ាន់ វាសនា និង លោកជំទាវឧកញ៉ា កែវ ដាលីស ផ្ដល់តាមរយៈសាខាកាកបាទក្រហមកម្ពុជា ខេត្តសៀមរាប ត្រូវបានប្រគល់ជូនលោកយាយ ណែម សោម អាយុ៨០ឆ្នាំ ជាស្ត្រីមេម៉ាយ ហើយពិការជើងស្ដាំ មានជំងឺប្រចាំកាយ រស់នៅក្នុងស្រុកស្រីស្នំ និងលោកយាយ សូ ឈត់ អាយុ៧៩ឆ្នាំ ជាស្ត្រីមេម៉ាយដូចគ្នា រស់នៅក្នុងស្រុកក្រឡាញ់ ដែលពិធីប្រគល់ធ្វើឡើងកាលពីថ្ងៃទី១១ ខែមិថុនា ឆ្នាំ២០២៦ ក្រោមវត្តមានចូលរួមពី លោកជំទាវ ទុយ ជិ ប្រាក់ សោភ័ណ អនុប្រធានគណៈកម្មាធិការសាខាកាកបាទក្រហមកម្ពុជាខេត្ត។

នៅថ្ងៃទី១១ ខែមិថុនា ឆ្នាំ២០២៦នេះ ដើមម្តេញ ដើមសណ្ដាន់ និងដើមរាំងចំនួន ១៥ ០០០ដើម ត្រូវបានរដ្ឋបាលខេត្តសៀមរាប ក្រោមកិច្ចសហការគាំទ្រពីមន្ទីរបរិស្ថានខេត្ត និងអង្គការកម្មវិធីអភិវឌ្ឍន៍សហប្រជាជាតិ ដាក់ដាំដើម្បីស្ដារព្រៃលិចទឹកនៅតំបន់អភិរក្សបឹងពារាំង ក្នុងតំបន់ប្រើប្រាស់ច្រើនយ៉ាងទន្លេសាប ភូមិសាស្ត្រខេត្តសៀមរាប ដោយមានការចូលរួមពីមន្ត្រីរាជការ និងប្រជាពលរដ្ឋជាច្រើនរូប។

កិច្ចប្រជុំបច្ចេកទេសលើកទី៤២ នៃគណៈកម្មាធិការអន្តរជាតិសម្របសម្រួលកិច្ចគាំពារ និងអភិវឌ្ឍន៍តំបន់រមណីយដ្ឋានប្រវត្តិសាស្រ្តអង្គរ និងសំបូរព្រៃគុក (ICC-Angkor Sambo Prei Kok) ដែលប្រព្រឹត្តទៅរយៈពេលពីរថ្ងៃ (៩-១០ មិថុនា ២០២៦) នៅខេត្តសៀមរាប បានបិទបញ្ចប់ដោយជោគជ័យ ព្រមទាំងបានប្រកាសពីលទ្ធផលសំខាន់ៗចំនួន ៧ចំណុច។ ថ្លែងក្នុងឱកាសបិទកិច្ចប្រជុំ នារសៀលថ្ងៃទី១០ ខែមិថុនា ឆ្នាំ២០២៦ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានអំពាវនាវឱ្យមានការយកចិត្តទុកដាក់ខ្ពស់ ចំពោះផលប៉ះពាល់លើបេតិកភណ្ឌវប្បធម៌ជាតិ និងពិភពលោក ដែលបង្កឡើងដោយការប៉ះទង្គិចនៅតាមបណ្តោយព្រំដែន ដើម្បីថែរក្សាសម្បត្តិវប្បធម៌ជាតម្លៃសម្រាប់មនុស្សជាតិ។ លោកជំទាវ ក៏បានបង្ហាញពីការចូលរួមរបស់រដ្ឋាភិបាលជប៉ុន សម្រាប់ការបន្តផ្តល់ថវិកា ៩០ម៉ឺនដុល្លារអាមេរិក សម្រាប់ដំណាក់កាលទី៧ នៃគម្រោងអភិរក្ស និងជួសជុលប្រាសាទបាយ័ន។ ស្របពេលដែល រដ្ឋាភិបាលសហរដ្ឋអាមេរិកបានផ្តល់ថវិកា ២៥ម៉ឺនដុល្លារអាមេរិក ជូនអង្គការមូលនិធិប្រាសាទពិភពលោក (WMF) ដើម្បីបន្តគម្រោងអភិរក្ស និងជួសជុលប្រាសាទភ្នំបាខែង។ លោកជំទាវបណ្ឌិតសភាចារ្យ ភឿង សកុណា ក៏បានបង្ហាញពីភាពជោគជ័យនៃគម្រោងប្រាសាទមេបុណ្យខាងលិច ដែលបញ្ចប់គម្រោងអភិរក្សរយៈពេល ១៤ឆ្នាំ ក្រោមជំនួយ ១២លានអឺរ៉ូពីបារាំង ហើយគ្រោងនឹងសម្ពោធជាផ្លូវការក្នុងអំឡុងកិច្ចប្រជុំកំពូលហ្វ្រង់កូហ្វូនី លើកទី២០ នាខែវិច្ឆិកា ឆ្នាំ២០២៦ខាងមុខ។ ដោយឡែកចំពោះលទ្ធផលនៃកិច្ចប្រជុំក៏បានបង្ហាញនូវការគាំទ្រលើគំនិតផ្តួចផ្តើមសំខាន់ៗ ដូចជាការកសាងធនធានមនុស្ស ការផ្ទេរនូវចំណេះដឹង ការពង្រឹងការប្រមូលនិងចងក្រងឯកសារទិន្នន័យនៃការស្រាវជ្រាវ និងជួសជុល ការរៀបចំមជ្ឈមណ្ឌលបដិសណ្ឋារកិច្ច និងមជ្ឈមណ្ឌលបកស្រាយព័ត៌មានអង្គរ ក៏ដូចជាការកសាងនូវហេដ្ឋារចនាសម្ព័ន្ធរូបវ័ន្ត និងផលិតផលទេសចរណ៍ថ្មីៗ ស្របតាមចក្ខុវិស័យនៃសេចក្តីប្រកាសសន្និសីទអន្តររដ្ឋាភិបាលលើកទី៤ ស្តីពីអង្គរ សំបូរព្រៃគុក កាលពីថ្ងៃទី១៥ ខែវិច្ឆិកា ឆ្នាំ២០២៣។ លោកជំទាវបណ្ឌិតសភាចារ្យ ក៏បានបង្ហាញពីការគ្រប់គ្រងដីធ្លី និងសំណង់ តាមរយៈការជំរុញការរៀបចំលិខិតបទដ្ឋានគតិយុត្ត និងផែនការគ្រប់គ្រងការប្រើប្រាស់ដី នគរូបនីយកម្ម និងសំណង់ ក្នុងតំបន់១ និងតំបន់២ នៃរមណីយដ្ឋានអង្គរ ចំនួន ១១៤ភូមិ ដឹកនាំដោយក្រសួងរៀបចំដែនដី នគរូបនីយកម្ម និងសំណង់ ដោយមានការចូលរួមពីរដ្ឋបាលខេត្តសៀមរាប អាជ្ញាធរជាតិអប្សរា និងក្រសួងស្ថាប័នពាក់ព័ន្ធ។ បន្ថែមពីលទ្ធផលសំខាន់ៗខាងលើ កិច្ចប្រជុំក៏បានសម្តែងការពេញចិត្តចំពោះវឌ្ឍនភាពការរៀបចំប្លង់មេ ក្នុងការគ្រប់គ្រងទឹកក្នុងតំបន់ រមណីយដ្ឋានអង្គរ ក្នុងក្របខណ្ឌនៃគម្រោង SDGERA ក្រោមកិច្ចសហការរវាងអាជ្ញាធរជាតិអប្សរា និងស្ថាប័នបារាំង SIAVB SIAAP AGERA និង Versailles Grand Parc ដើម្បីធានាការគ្រប់គ្រងធនធានទឹកប្រកបដោយចីរភាព ការការពារបេតិកភណ្ឌប្រព័ន្ធធារាសាស្ត្របុរាណ ក៏ដូចជាការកសាងសមត្ថភាព ដោយកៀរគរថវិកាបានប្រមាណ ១លានអឺរ៉ូ៕ អត្ថបទ និងរូបភាព៖ លោក យូ វង្ស កែសម្រួល៖ លោក អ៊ុន ណារាជ្យ