ព័ត៌មានក្នុងខេត្ត

ដើម្បីជាផ្នែកមួយនៃការលើកកម្ពស់វប្បធម៌ ទំនៀមទម្លាប់ ប្រពៃណីជាតិ ក៏ដូចជាផ្ដល់ឱកាសឱ្យប្រជាពលរដ្ឋបានកម្សាន្ដសប្បាយ និងទាក់ទាញភ្ញៀវទេសចរជាតិ-អន្តរជាតិ រដ្ឋបាលស្រុកក្រឡាញ់ សហការជាមួយរដ្ឋបាលឃុំតាអាន និងព្រះគ្រូចៅអធិការវត្តសរសៃពង បានរៀបចំពិធីប្រណាំងទូក «ង» ចាប់ពីថ្ងៃទី១២ ដល់ថ្ងៃទី១៣ ខែតុលា ឆ្នាំ២០២៦ នៅឯទំនប់ស្ពានស្រែង។

វត្តសំរោង ស្ថិតនៅភូមិសំរោងជើង ឃុំសំរោង ស្រុកសូទ្រនិគម ខេត្តសៀមរាប នៅថ្ងៃទី១២ ខែតុលា ឆ្នាំ២០២៦នេះ បានរៀបចំពិធីដង្ហែដូនតា ដើម្បីបន្តអនុវត្តទំនៀមទម្លាប់របស់ខ្មែរ ដែលពិធីដង្ហែដូនតានេះ មានអត្ថន័យជ្រាលជ្រៅពាក់ព័ន្ធនឹងជំនឿ ការគោរពដឹងគុណចំពោះបុព្វការីជន និងការថែរក្សាមរតកវប្បធម៌ប្រពៃណីពីដូនតាឱ្យបានគង់វង្ស ក្រោយពិធីបុណ្យកាន់បិណ្ឌ និងបុណ្យភ្ជុំបិណ្ឌ ដែលជាពិធីបុណ្យប្រពៃណីព្រះពុទ្ធសាសនា ដ៏សំខាន់មួយរបស់ប្រជាជនខ្មែរត្រូវបានបញ្ចប់។

ក្នុងកិច្ចពិភាក្សានៅថ្ងៃទី៩ ខែតុលា ឆ្នាំ២០២៦ ជាមួយព្រះគ្រូចៅអធិការវត្ដសរសៃពង ឃុំតាអាន ស្រុកក្រឡាញ់ ខេត្ដសៀមរាប ដែលដឹកនាំកីឡាករទូកងរត្រៀមប្រណាំងទូកក្នុងឱកាសបុណ្យភ្ជុំបិណ្ឌ នាថ្ងៃទី១២-១៣ ខែតុលា ឆ្នាំ២០២៦ នៅទំនប់ស្ពានស្រែង លោក ស៊ុន ចំណាន នាយករងរដ្ឋបាលសាលាខេត្ដសៀមរាប បានជំរុញ និងលើកទឹកចិត្ដដល់យុវជនទាំងអស់ចូលរួមហ្វឹកហាត់កីឡាទូកងរ ដើម្បីជាផ្នែកមួយក្នុងការលើកកម្ពស់វប្បធម៌ ប្រពៃណីទំនៀមទម្លាប់ និងចៀសឆ្ងាយបានពីគ្រឿងញៀន។

ដើម្បីជាការចូលរួមថែរក្សា និងលើកតម្កើងប្រពៃណីទំនៀមទម្លាប់ដ៏ល្អផូរផង់របស់ជាតិ គឺជាកាតព្វកិច្ច និងការទទួលខុសត្រូវរួមរបស់កូនខ្មែរគ្រប់រូប ក្នុងការបន្តថែរក្សាអត្តសញ្ញាណជាតិ ជំនឿសាសនា និងមរតកវប្បធម៌ដែលបុព្វបុរសខ្មែរបានបន្សល់ទុកតាំងពីបុរាណកាលមក។

ក្រោមការយកចិត្តទុកដាក់ពីសំណាក់រាជរដ្ឋាភិបាលកម្ពុជាចំពោះសុខទុក្ខរបស់បងប្អូនប្រជាពលរដ្ឋ ក៏ដូចជាការជួយកាត់បន្ថយការចំណាយក្នុងការធ្វើដំណើរមកលេងស្រុកកំណើតនាឱកាសបុណ្យភ្ជុំបិណ្ឌ រាជរដ្ឋាភិបាលកម្ពុជាបានផ្ដល់នូវរថយន្តក្រុងចំនួន ៦០០គ្រឿង សម្រាប់ដឹកជញ្ជូនបងប្អូនប្រជាពលរដ្ឋមកលេងស្រុកកំណើតតាមបណ្ដាខេត្តនានាដោយឥតគិតថ្លៃ មានរយៈពេល ៥ថ្ងៃ ចាប់ពីថ្ងៃទី៩ ដល់ថ្ងៃទី១៣ ខែតុលា ឆ្នាំ២០២៦។

នៅព្រឹកថ្ងៃទី៩ ខែតុលា ឆ្នាំ២០២៦នេះ រដ្ឋបាលខេត្តសៀមរាប បានបើកកិច្ចប្រជុំស្តីពីការពិនិត្យសេចក្តីព្រាងកម្មវិធីវិនិយោគបីឆ្នាំរំកិល (២០២៧-២០២៩) របស់រដ្ឋបាលខេត្ត ក្រោមការដឹកនាំកិច្ចប្រជុំដោយលោក សុខ ថុល អភិបាលរងខេត្តសៀមរាប។ កិច្ចប្រជុំនេះក៏មានការចូលរួមពីសំណាក់ថ្នាក់ដឹកនាំមន្ទីរ អង្គភាពជុំវិញខេត្ត មន្ត្រីជំនាញ និងអ្នកពាក់ព័ន្ធ ដើម្បីពិនិត្យ ពិភាក្សា និងផ្តល់ធាតុចូលលើសេចក្តីព្រាងកម្មវិធីវិនិយោគ សំដៅធានាឱ្យការរៀបចំផែនការអភិវឌ្ឍន៍របស់រដ្ឋបាលខេត្តមានភាពច្បាស់លាស់ គ្រប់ជ្រុងជ្រោយ និងឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋ។

ដើម្បីឆ្លើយតបបានទាន់ពេលវេលាទៅនឹងស្ថានភាពគ្រោះមហន្តរាយធម្មជាតិ និងកាត់បន្ថយផលប៉ះពាល់ដល់ជីវភាពរស់នៅរបស់ប្រជាពលរដ្ឋ នារសៀលថ្ងៃទី៨ ខែតុលា ឆ្នាំ២០២៦ រដ្ឋបាលខេត្តសៀមរាប បានបើកកិច្ចប្រជុំពិនិត្យ និងពិភាក្សាអំពីផលប៉ះពាល់ ព្រមទាំងការខូចខាតដែលបង្កឡើងដោយជំនន់ទឹកភ្លៀង ក្នុងភូមិសាស្ត្រខេត្ត ដឹកនាំកិច្ចប្រជុំដោយ លោក អុឹង គឹមលាងអភិបាលរងខេត្ត។

ថ្លែងក្នុងកម្មវិធីសន្ទនាមតិរបស់វិទ្យុជាតិ និងទូរទស្សន៍ កាលពីថ្ងៃទី៨ ខែតុលា ឆ្នាំ២០២៦នេះ លោក សឹម ធរដ្ឋ អនុប្រធានការិយាល័យផលិតកម្ម និងបសុព្យាបាល នៃមន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប បានគូសបញ្ជាក់ថា ជំងឺសារទឹកគឺជាជំងឺឆ្លងដែលកើតមានជាទូទៅលើសត្វគោ-ក្របី ហើយច្រើនតែផ្ទុះឡើងនៅអំឡុង ដើមរដូវវស្សា និងចុងរដូវវស្សា ខណៈ ការចាក់វ៉ាក់សាំងការពារជំងឺឆ្លងលើសត្វគោ-ក្របី ឱ្យបានទាន់ពេលវេលា ជាខែលការពារទ្រព្យសម្បត្តិ និងប្រភពចំណូលគ្រួសារ។

នៅព្រឹកថ្ងៃទី៨ ខែតុលា ឆ្នាំ២០២៦ រដ្ឋបាលខេត្តសៀមរាប បានបន្តចុះផ្សព្វផ្សាយអំពីបែបបទ នីតិវិធី នៃការទទួល និងផ្តល់សេវារដ្ឋបាល នៅអង្គភាពច្រកចេញចូលតែមួយ ព្រមទាំងបានធ្វើការបង្ហាញពីរបៀបប្រើប្រាស់កម្មវិធីព័ត៌មានវិទ្យា សម្រាប់ដាក់ពាក្យស្នើសុំសេវាអនឡាញ ជូនដល់និស្សិតនៃសាកលវិទ្យាល័យ បៀលប្រាយ (BBU) សាខាខេត្តសៀមរាប។

នាថ្ងៃទី៨ ខែតុលា ឆ្នាំ២០២៦ លោក អ៊ឹង គឹមលាង អភិបាលរងខេត្ត និងជាប្រធានក្រុមការងារប្រព័ន្ធស្បៀងប្រចាំខេត្តសៀមរាប បានដឹកនាំកិច្ចប្រជុំក្រុមការងារដឹកនាំគម្រោងប្រព័ន្ធស្បៀងប្រចាំខេត្ត ដោយមានការចូលរួមពីតំណាងស្ថាប័ន អង្គការដៃគូ និងមន្ទីរពាក់ព័ន្ធជាច្រើនរូប។

លោកស្រី អ៊ា សុខឡេង ប្រធានការិយាល័យអប់រំកុមារតូច នៃមន្ទីរអប់រំ យុវជន និងកីឡាខេត្តសៀមរាប មានប្រសាសន៍ថា ការអប់រំកុមារតូច ឬថ្នាក់មត្តេយ្យសិក្សា គឺជាគ្រឹះយ៉ាងសំខាន់មិនអាចខ្វះបានក្នុងការកសាង និងអភិវឌ្ឍធនធានមនុស្សឱ្យមានភាពពេញលេញទាំងកាយសម្បទា ប្រាជ្ញា ស្មារតី និងសីលធម៌ ដើម្បីចូលរួមចំណែកយ៉ាងសកម្មក្នុងការអភិវឌ្ឍសង្គម សេដ្ឋកិច្ចជាតិឱ្យមានការរីកចម្រើនជាលំដាប់ ខណៈ ការដឹកនាំ និងការផ្តល់សេវាអប់រំប្រកបដោយប្រសិទ្ធភាព គឺធ្វើឡើងដើម្បីឆ្លើយតបទៅនឹងតម្រូវការអភិវឌ្ឍពិតប្រាកដរបស់សង្គមជាតិ ដោយមានការចូលរួមយ៉ាងជិតស្និទ្ធពីគ្រប់ភាគីពាក់ព័ន្ធ ពិសេសគឺមាតាបិតា និងសហគមន៍។ លោកស្រី មានប្រសាសន៍ដូច្នេះ ក្នុងកម្មវិធីសន្ទនាមតិរបស់វិទ្យុជាតិ និងទូរទស្សន៍ជាតិខេត្តសៀមរាប កាលពីថ្ងៃទី៦ ខែតុលា ឆ្នាំ២០២៦នេះ។

លោកស្រី ធឿន សោភារី មន្ត្រីកម្មវិធីអាហារូបត្ថម្ភ នៃមន្ទីរសុខាភិបាល នៃរដ្ឋបាលខេត្តសៀមរាប បានមានប្រសាសន៍ថា ការបំបៅកូនដោយទឹកដោះម្ដាយ គឺជាវិធីដ៏សំខាន់មួយក្នុងការផ្តល់អាហារូបត្ថម្ភដល់ទារក និងជួយឱ្យកុមារលូតលាស់បានល្អ ទឹកដោះម្ដាយមានសារធាតុចិញ្ចឹមសំខាន់ៗ ដែលសមស្របនឹងតម្រូវការរបស់ទារក ជាពិសេសក្នុងអំឡុងពេលប៉ុន្មានខែដំបូងនៃជីវិត ។ លោកស្រីមានប្រសាសន៍ដូច្នេះ ក្នុងកម្មវិធីសន្ទនាមតិ របស់វិទ្យុ និង ទូរទស្សន៍ជាតិខេត្តសៀមរាប កាលពីថ្ងៃទី២៩ ខែកញ្ញា ឆ្នាំ២០២៦ កន្លងទៅថ្មីៗនេះ។