ព័ត៌មានក្នុងខេត្ត

នៅថ្ងៃទី១២ ខែមិថុនា ឆ្នាំ២០២៦ ក្រសួងបរិស្ថាន សហការជាមួយអង្គការដៃគូ បានរៀបចំសិក្ខាផ្សព្វផ្សាយស្ដីពីសូចនាករគន្លឹះពាក់ព័ន្ធនឹងសមភាពយេនឌ័រ និងបរិយាបន្នសង្គមនៃផែនការជាតិរួមចំណែកឆ្លើយតបនឹងការប្រែប្រួលអាកាសធាតុ និងផែនការយុទ្ធសាស្ត្របញ្រ្ជាបយេនឌ័រក្នុងវិស័យបរិស្ថាន ដែលនេះជាការរៀបចំលើកដំបូងក្នុងខេត្តសៀមរាប ដោយមានការចូលរួមពីមន្ត្រីមកពីខេត្តចំនួន១០ រួមមាន ខេត្តឧត្ដរមានជ័យ បន្ទាយមានជ័យ ប៉ៃលិន បាត់ដំបង ពោធិ៍សាត់ កំពង់ឆ្នាំង កំពង់ចាម កំពង់ធំ ព្រះវិហារ និងខេត្តសៀមរាប។

តាម​រយៈទេ​ព​កោ​ស​ល្យ​​គំ​​​នូ​​​រ​​ ​លោ​​​ក​​​ ​​​សិទ្ធ​​​ ​​​ឃ​​ន​​​​​​​​​​​​​​​​​​​​​​​​​​ ​មិន​ត្រឹ​មតែ​ជា​មុ​ខ​រ​ប​រអា​​​​​​​​​​​​​​​​​​ច​រ​ក​ប្រា​ក់ចំ​​ណូល​ប​ន្ថែ​ម​ស​ម្រា​ប់​គ្រួ​សា​រ​ប៉ុ​ណ្ណោះ​ទេ​ ​តែ​ក៏​រួ​ម​ចំ​ណែ​ក​យ៉ា​ង​ស​ក​ម្ម​ក្នុង​កា​រ​អ​ភិ​រ​ក្សសិ​ល្បៈ​ ​និ​ង​នាំ​វប្ប​ធ​ម៌​ខ្មែ​រ​ឱ្យ​ពិ​ភព​លោ​ក​បា​ន​ស្គា​​ល់

ផ្ទះមនុស្សធម៌ ២ខ្នង ជាអំណោយរបស់ អ្នកឧកញ៉ា វ៉ាន់ វាសនា និង លោកជំទាវឧកញ៉ា កែវ ដាលីស ផ្ដល់តាមរយៈសាខាកាកបាទក្រហមកម្ពុជា ខេត្តសៀមរាប ត្រូវបានប្រគល់ជូនលោកយាយ ណែម សោម អាយុ៨០ឆ្នាំ ជាស្ត្រីមេម៉ាយ ហើយពិការជើងស្ដាំ មានជំងឺប្រចាំកាយ រស់នៅក្នុងស្រុកស្រីស្នំ និងលោកយាយ សូ ឈត់ អាយុ៧៩ឆ្នាំ ជាស្ត្រីមេម៉ាយដូចគ្នា រស់នៅក្នុងស្រុកក្រឡាញ់ ដែលពិធីប្រគល់ធ្វើឡើងកាលពីថ្ងៃទី១១ ខែមិថុនា ឆ្នាំ២០២៦ ក្រោមវត្តមានចូលរួមពី លោកជំទាវ ទុយ ជិ ប្រាក់ សោភ័ណ អនុប្រធានគណៈកម្មាធិការសាខាកាកបាទក្រហមកម្ពុជាខេត្ត។

នៅថ្ងៃទី១១ ខែមិថុនា ឆ្នាំ២០២៦នេះ ដើមម្តេញ ដើមសណ្ដាន់ និងដើមរាំងចំនួន ១៥ ០០០ដើម ត្រូវបានរដ្ឋបាលខេត្តសៀមរាប ក្រោមកិច្ចសហការគាំទ្រពីមន្ទីរបរិស្ថានខេត្ត និងអង្គការកម្មវិធីអភិវឌ្ឍន៍សហប្រជាជាតិ ដាក់ដាំដើម្បីស្ដារព្រៃលិចទឹកនៅតំបន់អភិរក្សបឹងពារាំង ក្នុងតំបន់ប្រើប្រាស់ច្រើនយ៉ាងទន្លេសាប ភូមិសាស្ត្រខេត្តសៀមរាប ដោយមានការចូលរួមពីមន្ត្រីរាជការ និងប្រជាពលរដ្ឋជាច្រើនរូប។

កិច្ចប្រជុំបច្ចេកទេសលើកទី៤២ នៃគណៈកម្មាធិការអន្តរជាតិសម្របសម្រួលកិច្ចគាំពារ និងអភិវឌ្ឍន៍តំបន់រមណីយដ្ឋានប្រវត្តិសាស្រ្តអង្គរ និងសំបូរព្រៃគុក (ICC-Angkor Sambo Prei Kok) ដែលប្រព្រឹត្តទៅរយៈពេលពីរថ្ងៃ (៩-១០ មិថុនា ២០២៦) នៅខេត្តសៀមរាប បានបិទបញ្ចប់ដោយជោគជ័យ ព្រមទាំងបានប្រកាសពីលទ្ធផលសំខាន់ៗចំនួន ៧ចំណុច។ ថ្លែងក្នុងឱកាសបិទកិច្ចប្រជុំ នារសៀលថ្ងៃទី១០ ខែមិថុនា ឆ្នាំ២០២៦ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានអំពាវនាវឱ្យមានការយកចិត្តទុកដាក់ខ្ពស់ ចំពោះផលប៉ះពាល់លើបេតិកភណ្ឌវប្បធម៌ជាតិ និងពិភពលោក ដែលបង្កឡើងដោយការប៉ះទង្គិចនៅតាមបណ្តោយព្រំដែន ដើម្បីថែរក្សាសម្បត្តិវប្បធម៌ជាតម្លៃសម្រាប់មនុស្សជាតិ។ លោកជំទាវ ក៏បានបង្ហាញពីការចូលរួមរបស់រដ្ឋាភិបាលជប៉ុន សម្រាប់ការបន្តផ្តល់ថវិកា ៩០ម៉ឺនដុល្លារអាមេរិក សម្រាប់ដំណាក់កាលទី៧ នៃគម្រោងអភិរក្ស និងជួសជុលប្រាសាទបាយ័ន។ ស្របពេលដែល រដ្ឋាភិបាលសហរដ្ឋអាមេរិកបានផ្តល់ថវិកា ២៥ម៉ឺនដុល្លារអាមេរិក ជូនអង្គការមូលនិធិប្រាសាទពិភពលោក (WMF) ដើម្បីបន្តគម្រោងអភិរក្ស និងជួសជុលប្រាសាទភ្នំបាខែង។ លោកជំទាវបណ្ឌិតសភាចារ្យ ភឿង សកុណា ក៏បានបង្ហាញពីភាពជោគជ័យនៃគម្រោងប្រាសាទមេបុណ្យខាងលិច ដែលបញ្ចប់គម្រោងអភិរក្សរយៈពេល ១៤ឆ្នាំ ក្រោមជំនួយ ១២លានអឺរ៉ូពីបារាំង ហើយគ្រោងនឹងសម្ពោធជាផ្លូវការក្នុងអំឡុងកិច្ចប្រជុំកំពូលហ្វ្រង់កូហ្វូនី លើកទី២០ នាខែវិច្ឆិកា ឆ្នាំ២០២៦ខាងមុខ។ ដោយឡែកចំពោះលទ្ធផលនៃកិច្ចប្រជុំក៏បានបង្ហាញនូវការគាំទ្រលើគំនិតផ្តួចផ្តើមសំខាន់ៗ ដូចជាការកសាងធនធានមនុស្ស ការផ្ទេរនូវចំណេះដឹង ការពង្រឹងការប្រមូលនិងចងក្រងឯកសារទិន្នន័យនៃការស្រាវជ្រាវ និងជួសជុល ការរៀបចំមជ្ឈមណ្ឌលបដិសណ្ឋារកិច្ច និងមជ្ឈមណ្ឌលបកស្រាយព័ត៌មានអង្គរ ក៏ដូចជាការកសាងនូវហេដ្ឋារចនាសម្ព័ន្ធរូបវ័ន្ត និងផលិតផលទេសចរណ៍ថ្មីៗ ស្របតាមចក្ខុវិស័យនៃសេចក្តីប្រកាសសន្និសីទអន្តររដ្ឋាភិបាលលើកទី៤ ស្តីពីអង្គរ សំបូរព្រៃគុក កាលពីថ្ងៃទី១៥ ខែវិច្ឆិកា ឆ្នាំ២០២៣។ លោកជំទាវបណ្ឌិតសភាចារ្យ ក៏បានបង្ហាញពីការគ្រប់គ្រងដីធ្លី និងសំណង់ តាមរយៈការជំរុញការរៀបចំលិខិតបទដ្ឋានគតិយុត្ត និងផែនការគ្រប់គ្រងការប្រើប្រាស់ដី នគរូបនីយកម្ម និងសំណង់ ក្នុងតំបន់១ និងតំបន់២ នៃរមណីយដ្ឋានអង្គរ ចំនួន ១១៤ភូមិ ដឹកនាំដោយក្រសួងរៀបចំដែនដី នគរូបនីយកម្ម និងសំណង់ ដោយមានការចូលរួមពីរដ្ឋបាលខេត្តសៀមរាប អាជ្ញាធរជាតិអប្សរា និងក្រសួងស្ថាប័នពាក់ព័ន្ធ។ បន្ថែមពីលទ្ធផលសំខាន់ៗខាងលើ កិច្ចប្រជុំក៏បានសម្តែងការពេញចិត្តចំពោះវឌ្ឍនភាពការរៀបចំប្លង់មេ ក្នុងការគ្រប់គ្រងទឹកក្នុងតំបន់ រមណីយដ្ឋានអង្គរ ក្នុងក្របខណ្ឌនៃគម្រោង SDGERA ក្រោមកិច្ចសហការរវាងអាជ្ញាធរជាតិអប្សរា និងស្ថាប័នបារាំង SIAVB SIAAP AGERA និង Versailles Grand Parc ដើម្បីធានាការគ្រប់គ្រងធនធានទឹកប្រកបដោយចីរភាព ការការពារបេតិកភណ្ឌប្រព័ន្ធធារាសាស្ត្របុរាណ ក៏ដូចជាការកសាងសមត្ថភាព ដោយកៀរគរថវិកាបានប្រមាណ ១លានអឺរ៉ូ៕ អត្ថបទ និងរូបភាព៖ លោក យូ វង្ស កែសម្រួល៖ លោក អ៊ុន ណារាជ្យ

នៅព្រឹកថ្ងៃទី១១ ខែមិថុនា ឆ្នាំ២០២៦ លោកជំទាវ យូ សុភា សមាជិកក្រុមប្រឹក្សាខេត្ដ និងជាអនុប្រធានគណៈកម្មាធិការពិគ្រោះយោបល់កិច្ចការស្រ្ដី និងកុមារនៃរដ្ឋបាលខេត្ដសៀមរាប និងលោក សុខ ថុល អភិបាលរងខេត្ដ និងជាប្រធានក្រុមការងារកសាងផែនការអភិវឌ្ឍន៍រយៈពេល៥ឆ្នាំ និងកម្មវិធីវិនិយោគបីឆ្នាំរំកិលរបស់រដ្ឋបាលខេត្ដ បានដឹកនាំបើកកិច្ចប្រជុំផ្សព្វផ្សាយ និងកសាងកម្មវិធីវិនិយោគបីឆ្នាំរំកិល ដើម្បីធានាថាការអភិវឌ្ឍនៅថ្នាក់ក្រោមជាតិមានភាពស៊ីសង្វាក់គ្នា ប្រកបដោយប្រសិទ្ធភាព និងឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋ។ លោក សុខ ថុល មានប្រសាសន៍ថា ការកសាងកម្មវិធីវិនិយោគបីឆ្នាំរំកិលខេត្ត គឺជាការដែលធ្វើឱ្យខ្លឹមសារនៃផែនការអភិវឌ្ឍន៍ខេត្ត ទៅជាសកម្មភាព ឬសេវាជាក់ស្ដែង ដោយមានភ្ជាប់នូវចំណាយមូលនិធិ សំដៅលើកកម្ពស់ការផ្តល់សេវាសាធារណៈ និងកិច្ចអភិវឌ្ឍនៅក្នុងខេត្តសម្រាប់រយៈពេលបីឆ្នាំ និងធ្វើបច្ចុប្បន្នភាពជារៀងរាល់ឆ្នាំ។ កម្មវិធីវិនិយោគបីឆ្នាំរំកិលខេត្ត ឆ្លុះបញ្ចាំងពីគម្រោង ឬសេវាជាអាទិភាព និងតម្លៃតាមបណ្តាឆ្នាំនីមួយៗ ក្នុងរយៈពេលបីឆ្នាំ ស្របនឹងក្របខ័ណ្ឌចំណាយរយៈពេលមធ្យមរបស់រដ្ឋបាលខេត្ត។ គម្រោងសកម្មភាពវិនិយោគ គឺជាគម្រោង សកម្មភាពត្រូវចំណាយមូលនិធិដោយមានពេលចាប់ផ្តើម និងពេលបញ្ចប់ច្បាស់លាស់ ដែលរៀបចំឡើងដើម្បីបង្កើតទ្រព្យសម្បត្តិសាធារណៈ ហេដ្ឋារចនាសម្ព័ន្ធរូបវន្ត និងអរូបវន្ត និងសេវាកម្មសម្រាប់ឆ្លើយតបតាមតម្រូវការជាអាទិភាពរបស់ប្រជាពលរដ្ឋ។ លោក សុខ ថុល មានប្រសាសន៍ទៀតថា ការកសាងកម្មវិធីវិនិយោគ៣ឆ្នាំរំកិល ត្រូវបានរៀបចំឡើងដើម្បីបង្ហាញពីទិន្នន័យនៃគម្រោង វិនិយោគសាធារណៈ ដែលមានអាទិភាពខ្ពស់របស់ក្រសួង ស្ថាប័នសម្រាប់អនុវត្ត ដើម្បីចូលរួមចំណែកសម្រេចបានគោលនយោបាយអាទិភាពនានា ដែលមានចែងនៅក្នុងយុទ្ធសាស្ត្របញ្ចកោណ ដំណាក់កាលទី១ និងក្នុងផែនការយុទ្ធសាស្ត្រអភិវឌ្ឍន៍ជាតិរបស់រាជរដ្ឋាភិបាលនីតិកាលទី៧ នៃរដ្ឋសភា និងដើម្បីជាធាតុចូលសម្រាប់រៀបចំក្របខ័ណ្ឌ ហិរញ្ញវត្ថុសាធារណៈរយៈពេលមធ្យមឆ្នាំ២០២៧-២០២៩ ក្របខ័ណ្ឌថវិការយៈពេលមធ្យមឆ្នាំ២០២៧-២០២៩ ផែនការយុទ្ធសាស្ត្រថវិកាឆ្នាំ២០២៧-២០២៩ និងសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៧។ លោកអភិបាលរងខេត្ត បានបន្ដថា កម្មវិធីវិនិយោគសាធារណៈ ៣ឆ្នាំរំកិល ២០២៧-២០២៩ បានឆ្លុះបញ្ចាំងកិច្ចខិតខំប្រឹងប្រែងរបស់រាជរដ្ឋាភិបាលរួមគ្នា ដើម្បីធានាថាធនធានជាតិ និងហិរញ្ញប្បទានកិច្ចសហប្រតិបត្តិការអភិវឌ្ឍ ត្រូវបានកៀរគរហើយធ្វើការវិភាជដែលអាចនាំមកនូវផលជះជាអតិបរិមា សម្រាប់ការអភិវឌ្ឍប្រកបដោយចីរភាព និងដើម្បីពង្រឹងប្រសិទ្ធភាព សក្តិសិទ្ធិភាព និងតម្លាភាពនៃការគ្រប់គ្រងការវិនិយោគសាធារណៈ។ លោកក៏បានសង្កត់ធ្ងន់ថា កិច្ចប្រជុំនាពេលនេះដែរ មានគោលដៅប្រែក្លាយផែនការអភិវឌ្ឍន៍ដែលជាក្រដាសស្នាម ឱ្យទៅជាគម្រោងវិនិយោគជាក់ស្តែង ដែលមានថវិកាគាំទ្រច្បាស់លាស់ ក្នុងគោលបំណងលើកកម្ពស់ជីវភាពរស់នៅរបស់ប្រជាពលរដ្ឋ និងការអភិវឌ្ឍមូលដ្ឋានប្រកបដោយចីរភាព៕ អត្ថបទ និងរូបភាព៖ លោក អោត រត់ កែសម្រួល៖ លោក អ៊ុន ណារាជ្យ

ទិដ្ឋភាពថ្ងៃរៀបលិចនៅទន្លេអុំ! ពេលព្រះអាទិត្យចាប់ផ្ដើមលិចបន្តិចម្ដងៗ ពន្លឺពណ៌មាសបានចាំងឆ្លុះលើផ្ទៃទឹកទន្លេអុំ បង្កើតបានជាទេសភាពដ៏ស្រស់ស្អាត និងស្ងប់ស្ងាត់គួរឱ្យចង់គយគន់។ ខ្យល់ត្រជាក់បក់ប៉ះស្លឹកឈើ រួមជាមួយទេសភាពធម្មជាតិជុំវិញ បានធ្វើឱ្យទីកន្លែងមួយនេះ ក្លាយជាគោលដៅដ៏ល្អសម្រាប់ការសម្រាកលំហែកាយ និងថតរូបអនុស្សាវរីយ៍។

នៅរសៀលថ្ងៃទី១០ ខែមិថុនា ឆ្នាំ២០២៦នេះ លោក អុឹង គឹមលាង អភិបាលរងខេត្តសៀមរាប បានដឹកនាំកិច្ចប្រជុំពិនិត្យ និងពិភាក្សាអំពីករណីសំណើសុំស្តារអូរចិញ្ចៀន ប្រវែង ៥គីឡូម៉ែត្រ ទទឹង ១៥ម៉ែត្រ និងជម្រៅ ៤ម៉ែត្រ ស្ថិតក្នុងភូមិតាភោគ និងភូមិគោកត្រាច ឃុំបាគង ស្រុកប្រាសាទបាគង ខេត្តសៀមរាប។ តាមរយៈសំណើរបស់មេភូមិតាភោគ និងភូមិគោកត្រាច បានបញ្ជាក់ថា មូលហេតុនៃការសុំស្ដារនេះ ដោយសារស្ថានភាពអូរចិញ្ចៀនបច្ចុប្បន្ននេះ មានសភាពគោករាក់ និងរួមតូចដោយកត្តាធម្មជាតិ ដែលធ្វើឱ្យខ្វះខាតទឹកប្រើប្រាស់នៅរដូវប្រាំង ប្រជាពលរដ្ឋក្នុងភូមិទាំង២ មានភូមិតាភោគ និងភូមិគោកត្រាច បានសំណូមសុំឱ្យមានការស្តារអូរចិញ្ចៀននេះឡើងវិញ។ ប្រយោជន៍សំខាន់នៃការស្ដារនេះ គឺរក្សាទឹកទុកសម្រាប់ប្រើប្រាស់ សម្រាប់ស្រោចស្រពស្រូវវស្សានិងដំណាំរួមផ្សំនានា ការរំដោះទឹកជំនន់ និងទប់ស្កាត់ការរំលោភយកដីចំណីអូរធ្វើជាកម្មសិទ្ធឯកជន។ ការស្តារអូរចិញ្ចៀននេះ មានភូមិសាស្ត្រនៅឃុំបាគង ដែលមានគ្រួសារទទួលផលសរុប ៣៩០គ្រួសារ។ ក្នុងឱកាសដឹកនាំកិច្ចប្រជុំ លោក អុឹង គឹមលាង អភិបាលរងខេត្ត បានណែនាំដល់អ្នកទទួលខុសត្រូវគម្រោង ត្រូវសហការជាមួយមន្ត្រីបច្ចេកទេស អាជ្ញាធរមូលដ្ឋាន ចុះសិក្សាលក្ខណបច្ចេកទេសឡើងវិញជាមុនសិន ដើម្បីមានមូលដ្ឋានលើការស្ដារ និងការរៀបចំប្លង់បច្ចេកទេសនៃការជួសជុល ឬការសាងសង់សំណង់សិល្បការ្យ ឱ្យបានច្បាស់លាស់ ស្របតាមតម្រូវការជាក់ស្ដែងរបស់ប្រជាពលរដ្ឋ និងស្របតាមនីតិវិធី គោលការណ៍ច្បាប់ និងលិខិតបទដ្ឋានគតិយុត្តនានាជាធរមាន។ ជាពិសេសត្រូវបញ្ចៀសបាននូវផលប៉ះពាល់បរិស្ថាន និងផ្ទៃអូរធម្មជាតិ និងធ្វើរបាយការណ៍លាយលក្ខណ៍អក្សរ លើកមតិយោបល់មករដ្ឋបាលខេត្ត ដើម្បីរដ្ឋបាលខេត្ត មានមូលដ្ឋានពិនិត្យ និងសម្រេច៕ អត្ថបទ និងរូបភាព៖ លោក ធន់ ពូថេ កែសម្រួល៖ លោក អ៊ុន ណារាជ្យ

វិញ្ញាបនបត្រសម្គាល់ម្ចាស់អចលនវត្ថុ ២ ៨៧៩បណ្ណ ក្នុងស្រុកប្រាសាទបាគង ត្រូវបានប្រគល់ជូនប្រជាពលរដ្ឋម្ចាស់កម្មសិទ្ធយកទៅប្រើប្រាស់តាមតម្រូវការ វិញ្ញាបនបត្រសម្គាល់ម្ចាស់អចលនវត្ថុចំនួន ២ ៨៧៩បណ្ណ លើក្បាលដីសរុប ៣ ៣៨៣ក្បាលដី ស្ថិតក្នុងលលៃ ភូមិស្ទឹង ភូមិគោកត្រាច ភូមិតាភោគ នៃឃុំបាគង ស្រុកប្រាសាទបាគង ខេត្តសៀមរាប ត្រូវបានប្រគល់ជូនបងប្អូនប្រជាពលរដ្ឋជាម្ចាស់កម្មសិទ្ធយកទៅប្រើប្រាស់តាមតម្រូវការ នៅរសៀលថ្ងៃទី១០ ខែមិថុនា ឆ្នាំ២០២៦នេះ ក្រោមវត្តមានចូលរួមពី ឯកឧត្តម សួស សុខចាន់ និង ឯកឧត្តម ឡុក ឡង់ឌី សមាជិកក្រុមប្រឹក្សាខេត្ត និង លោក ឌី រ៉ាដូ អភិបាលរងខេត្ត ដោយមានការចូលរួមពីអ្នកពាក់ព័ន្ធជាច្រើនរូបទៀត។ លោក ស៊ុន សុជាតិ អនុប្រធានមន្ទីររៀបចំដែនដីខេត្ត បានឱ្យដឹងថា បណ្ណកម្មសិទ្ធិដែលបានចេញជូននេះ គឺផ្តល់ជូនចំពោះតែក្បាលដីណាដែលមិនមានទំនាស់តវ៉ា មិនជាប់ពាក់ព័ន្ធនឹងបុរាណដ្ឋាន ឬតំបន់ថែរក្សាការពារដែលគ្រប់គ្រងដោយអាជ្ញាធរ និងមន្ទីរពាក់ព័ន្ធ។ ចំពោះក្បាលដីជាប់ពាក់ព័ន្ធទំនាស់ផ្សេងៗ គណៈកម្មការរដ្ឋបាលនឹងបន្តពិនិត្យដោះស្រាយតាមនីតិវិធីជាបន្តបន្ទាប់ ដើម្បីឈានដល់ការចេញបណ្ណជូនបន្តទៀត។ លោកអនុប្រធានមន្ទីរ បានឱ្យដឹងទៀតថា នៅក្នុងដំណើរការនាពេលនេះ ស្ថាប័នជំនាញបានសម្រេចការចេញបណ្ណកម្មសិទ្ធិជូនប្រជាពលរដ្ឋក្នុងភូមិទាំង៤ សរុបចំនួន ២ ៨៧៩បណ្ណ ក្នុងចំណោមក្បាលដីសរុប ៣ ៣៨៣ក្បាលដី។ ក្នុងនោះភូមិលលៃ បានចំនួន ២៦៦បណ្ណ, ភូមិស្ទឹង ៥៤៧បណ្ណ, ភូមិគោកត្រាច ១ ៥១០បណ្ណ និងភូមិតាភោគ បានចំនួន ៥៥៦បណ្ណ។ ឯកឧត្តម សួស សុខចាន់ សមាជិកក្រុមប្រឹក្សាខេត្ត មានប្រសាសន៍ថា រាជរដ្ឋាភិបាលកម្ពុជាក្រោមការដឹកនាំរបស់ សម្ដេចធិបតី ហ៊ុន ម៉ាណែត នាយករដ្ឋមន្រ្តី រួមនិងក្រសួងរៀបចំដែនដី និងរដ្ឋបាលខេត្តសៀមរាប បានយកចិត្តទុកដាក់បំផុតលើការអនុវត្តកិច្ចការដីធ្លី ដោយបានឧបត្ថម្ភគាំទ្រទាំងផ្នែកបច្ចេកទេស និងផ្នែកច្បាប់ក្នុងដំណើរការចុះបញ្ជីដីធ្លីនៅក្នុងភូមិសាស្ត្រខេត្តសៀមរាប ឱ្យមានភាពកាន់តែល្អប្រសើរឡើង ដើម្បីផ្តល់បណ្ណកម្មសិទ្ធិស្របច្បាប់ជូនដល់បងប្អូនប្រជាពលរដ្ឋជាម្ចាស់ដី។ បណ្ណកម្មសិទ្ធិនេះ គឺត្រូវបានការពារដោយច្បាប់ និងធានាដោយរដ្ឋ ហើយក៏គ្មានបុគ្គលណាមួយត្រូវបានគេដកហូតកម្មសិទ្ធិរបស់ខ្លួនបានទេ។ លោក ឌី រ៉ាដូ អភិបាលរងខេត្ត បានមានប្រសាសន៍ថា បច្ចុប្បន្នខេត្តសៀមរាប បានដំណើរការប្រកាសតំបន់វិនិច្ឆ័យតាមបណ្តាឃុំសង្កាត់ នៃក្រុងស្រុកទាំង១៣ ដែលបាននិងកំពុងអនុវត្តការចុះបញ្ជីដីមានលក្ខណៈជាប្រព័ន្ធទូទាំងខេត្ត ដើម្បីចុះបញ្ជីឱ្យបានគ្រប់ក្បាលដីតាមការកំណត់របស់រាជរដ្ឋាភិបាល។ លោកអភិបាលរងខេត្ត បញ្ជាក់ថា វិញ្ញាបនបត្រសម្គាល់ម្ចាស់អចលនវត្ថុ ជាឯកសារគតិយុត្តមួយដែលគ្មានអាយុកាល និងមានតម្លៃសម្រាប់រដ្ឋ ក៏ដូចជាប្រជាពលរដ្ឋជាម្ចាស់ដី និងអ្នកកាន់កាប់ដីទទួលបាននូវសារៈប្រយោជន៍ ដូចជា រដ្ឋគ្រប់គ្រងដីធ្លី ទាំងដីរដ្ឋ និងដីឯកជន ងាយស្រួលក្នុងការងាររៀបចំដែនដី និងរដ្ឋបាលដីធ្លី ការបែងចែកដី ការលើកស្ទួយកម្រិតជីវភាពរស់នៅរបស់ប្រជាពលរដ្ឋ កាត់បន្ថយបាននូវវិវាទដីធ្លី ធានាសុវត្ថិភាពក្នុងការកាន់កាប់ដីធ្លីនិង ទទួលបាននូវសិទ្ធិស្របច្បាប់ក្លាយជាម្ចាស់ដីពិតប្រាកដដែលត្រូវបាន ការពារដោយច្បាប់ និងធានាដោយរដ្ឋ។ ប្រជាពលរដ្ឋអាចប្រើប្រាស់ បណ្ណកម្មសិទ្ធិ ដើម្បីផលប្រយោជន៍ ផ្សេងៗក្នុងការប្រកបមុខរបរ ឬអាជីវកម្មលើ ដីធ្លីរបស់ខ្លួនដោយគ្មានការព្រួយបារម្ភ៕ អត្ថបទ និងរូបភាព៖ លោក ឡៃ បញ្ញា កែសម្រួល៖ លោក អ៊ុន ណារាជ្យ

ប្រជាពលរដ្ឋនៅឃុំសង្វើយ ស្រុកជីក្រែង រីករាយនឹងសមិទ្ធផលផ្លូវបេតុងថ្មី និងការបំពាក់ភ្លើងបំភ្លឺផ្លូវ បានជួយសម្រួលដល់ការធ្វើដំណើរ និងជាកត្តាជំរុញដ៏សំខាន់ក្នុងការលើកកម្ពស់សេដ្ឋកិច្ចមូលដ្ឋាន។ សូមថ្លែងអំណរគុណ ឯកឧត្តម ប្រាក់ សោភ័ណ អភិបាលខេត្តសៀមរាប និងអាជ្ញាធរមូលដ្ឋាន សម្រាប់ការផ្ដល់ជូននូវសមិទ្ធផលថ្មីជូនប្រជាពលរដ្ឋ។

លោក ង៉ូវ សេងកាក់ អភិបាលរងខេត្តសៀមរាប តំណាង ឯកឧត្តម ប្រាក់ សោភ័ណ អភិបាលខេត្ត បានដឹកនាំគណៈប្រតិភូខេត្តសៀមរាប ចូលរួមសន្និសីទថ្នាក់ដឹកនាំទីក្រុងអាស៊ាន (ASEAN City Leaders Conference) សន្និសីទនេះរៀបចំរួមគ្នាដោយទីក្រុងហាណូយ និងក្រសួងការបរទេសវៀតណាម នាថ្ងៃទី៧-១០ ខែមិថុនា ឆ្នាំ២០២៦កន្លងទៅនេះ ដោយមានការគាំទ្រពីលេខាធិការដ្ឋានអាស៊ាន និងវិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា។ សូមជម្រាបថា សន្និសីទថ្នាក់ដឹកនាំទីក្រុងអាស៊ាន ដោយផ្តោតលើអភិបាលកិច្ចឆ្លាតវៃ និងការអភិវឌ្ឍទីក្រុងប្រកបដោយនិរន្តរភាព ក្រោមប្រធានបទ “ជំរុញអនាគតតាមរយៈទីក្រុងឆ្លាតវៃ និរន្តរភាព និងការតភ្ជាប់គ្នា” ដោយមានការចូលរួមពីថ្នាក់ដឹកនាំទីក្រុង អ្នកជំនាញ និងតំណាងអង្គការអន្តរជាតិប្រមាណ ៣៥០នាក់ ដើម្បីពិភាក្សា និងផ្លាស់ប្តូរបទពិសោធន៍អំពីអភិបាលកិច្ចទីក្រុងក្នុងបរិបទនៃការអភិវឌ្ឍយ៉ាងឆាប់រហ័សរបស់តំបន់អាស៊ាន។ កិច្ចពិភាក្សាសំខាន់ៗបានផ្តោតលើការអភិវឌ្ឍទីក្រុងក្នុងយុគសម័យឌីជីថល ការប្រើប្រាស់បញ្ញាសិប្បនិម្មិត (AI) ដើម្បីបង្កើនប្រសិទ្ធភាពនៃការគ្រប់គ្រង និងការផ្តល់សេវាសាធារណៈ ព្រមទាំងការកសាងទីក្រុងបៃតងដែលអាចទប់ទល់នឹងការប្រែប្រួលអាកាសធាតុ។ ក្រៅពីការពិភាក្សា សន្និសីទនេះក៏មានគោលបំណងពង្រឹងកិច្ចសហប្រតិបត្តិការរវាងទីក្រុងនានាក្នុងអាស៊ាន ជំរុញការអនុវត្តចក្ខុវិស័យសហគមន៍អាស៊ានឆ្នាំ ២០៤៥ និងបង្កើនទំនាក់ទំនងសេដ្ឋកិច្ច ពាណិជ្ជកម្ម ទេសចរណ៏និងវប្បធម៌ក្នុងតំបន់។ តាមរយៈសន្និសីទនេះដែរ គណៈប្រតិភូខេត្តសៀមរាប ក៏បានជួបពិភាក្សាការងារជាមួយ ឯកឧត្តម Nguyen Loc Ha អនុប្រធានអចិន្ត្រៃយ៍នៃគណៈកម្មាធិការប្រជាជនទីក្រុងហូជីមិញ ផ្តោតលើការជំរុញកិច្ចសហប្រតិបត្តិការលើវិស័យសំខាន់ៗមួយចំនួន រួមមាន៖ វិស័យទេសចរណ៍ តាមរយៈការរៀបចំកម្មវិធីផ្សព្វផ្សាយរួម និងការតភ្ជាប់គោលដៅទេសចរណ៍រវាងទីក្រុងហូជីមិញ និងខេត្តសៀមរាប។ ជាពិសេសការជំរុញការវិនិយោគ និងពាណិជ្ជកម្ម ដោយលើកទឹកចិត្តសហគ្រាស និងវិនិយោគិនពីទីក្រុងហូជីមិញ មកស្វែងយល់ពីសក្តានុពលវិនិយោគនៅខេត្តសៀមរាប លើវិស័យកសិកម្មទំនើប ពាណិជ្ជកម្ម ឧស្សាហកម្មកែច្នៃ សេវាកម្ម និងហេដ្ឋារចនាសម្ព័ន្ធ ព្រមទាំងការអភិវឌ្ឍធនធានមនុស្ស តាមរយៈការបណ្តុះបណ្តាលមន្ត្រីរាជការ ការបណ្តុះបណ្តាលជំនាញវិជ្ជាជីវៈ និងការផ្លាស់ប្តូរបច្ចេកវិទ្យា និងនវានុវត្តន៍ រួមនឹងការអនុវត្តរដ្ឋបាលឌីជីថល ការផ្តល់សេវាសាធារណៈតាមប្រព័ន្ធឌីជីថល និងការកសាងទីក្រុងឆ្លាតវៃ។ ក្រោមកិច្ចសម្របសម្រួលពីប្រធានគណៈកម្មាធិការប្រជាជនទីក្រុងហាណូយ ថ្នាក់ដឹកនាំគណៈប្រតិភូទីក្រុងអាស៊ាន ក៏បានចូលជួបសំដែងការគួរសមជាមួយ ឯកឧត្តម Tran Thanh Man ប្រធានរដ្ឋសភានៃសាធារណៈរដ្ឋសង្គមនិយមវៀតណាម។ នៅក្នុងជំនួបនោះ តំណាងថ្នាក់ដឹកនាំទីក្រុងអាស៊ាន រួមមានថ្នាក់ដឹកនាំនៃខេត្តហ្លួងប្រាបាង្គ រដ្ឋបាលតំបន់ម៉ានដាទ្បេ និង ប្រតិភូខេត្តសៀមរាប បានសម្តែងការអរគុណចំពោះការទទួលស្វាគមន៍យ៉ាងកក់ក្តៅ និងប្រកបដោយកិត្តិយសពីរដ្ឋសភា និងស្ថាប័ននានារបស់វៀតណាម។ គណៈប្រតិភូបានវាយតម្លៃខ្ពស់ចំពោះសន្និសីទមេដឹកនាំទីក្រុងអាស៊ាន ដោយចាត់ទុកវាជាវេទិកាដ៏សំខាន់មួយសម្រាប់ទីក្រុងនានា ក្នុងការផ្លាស់ប្តូរបទពិសោធន៍ ចែករំលែកគំរូអភិវឌ្ឍន៍ដែលមានប្រសិទ្ធភាព និងជំរុញកិច្ចសហប្រតិបត្តិការ៕ អត្ថបទ និងរូបភាព៖ លោក អ៊ុន ណារាជ្យ

អាជ្ញាធរជាតិអប្សរា និងអាជ្ញាធរជាតិសំបូរព្រៃគុក បានចេញសេចក្តីប្រកាសព័ត៌មានស្តីពីលទ្ធផលនៃកិច្ចប្រជុំបច្ចេកទេសលើកទី៤២ នៃអាយស៊ីស៊ី-អង្គរ/សំបូរព្រៃគុក ដែលបានប្រព្រឹត្តទៅនៅខេត្តសៀមរាប។ លទ្ធផលសំខាន់ៗរួមមាន៖ ការសម្តែងក្តីបារម្ភលើផលប៉ះពាល់ដល់បេតិកភណ្ឌពីការប៉ះទង្គិចគ្នានៅតាមព្រំដែនកម្ពុជា-ថៃ, ការបន្តគាំទ្រថវិកា ៩០០,០០០ ដុល្លារ ពីជប៉ុនសម្រាប់ប្រាសាទបាយ័ន និង ២៥០,០០០ ដុល្លារ ពីអាមេរិកសម្រាប់ប្រាសាទភ្នំបាខែង។ ក្រៅពីនេះ គម្រោងជួសជុលប្រាសាទមេបុណ្យខាងលិច (ឧបត្ថម្ភដោយបារាំង ១២លានអឺរ៉ូ) នឹងត្រូវបញ្ចប់ និងសម្ពោធក្នុងខែវិច្ឆិកា ឆ្នាំ២០២៦ ស្របពេលជាមួយគ្នានឹងកិច្ចប្រជុំកំពូលហ្វ្រង់កូហ្វូនីលើកទី២០។ កិច្ចប្រជុំក៏បានបង្ហាញពីវឌ្ឍនភាពលើការរៀបចំផែនការគ្រប់គ្រងដីធ្លី សំណង់ និងការគ្រប់គ្រងទឹកក្នុងតំបន់អង្គរផងដែរ។