ក្នុងពិធីប្រគល់បណ្ណសរសើរ និងរង្វាន់លើកទឹកចិត្តដល់សិស្ស សម្រាប់ឆ្នាំសិក្សា២០២៥-២០២៦ និងផ្តល់សម្ភារសិក្សាដល់សិស្ស ព្រមទាំងឧបត្ថម្ភស្បៀងអាហារជូនដល់គ្រួសារសិស្សដែលមានជីវភាពខ្វះខាត នៃសាលាបឋមសិក្សាចុងឃ្នៀស ក្នុងសង្កាត់ចុងឃ្នៀស ក្រុងសៀមរាប នៅថ្ងៃទី២៨ ខែកញ្ញា ឆ្នាំ២០២៦ អាជ្ញាធរសង្កាត់ រួមនឹងគណៈគ្រប់គ្រងសាលា បានទទូចសុំឱ្យអាណាព្យាបាលសិស្ស ជំរុញកូនចៅឱ្យបានរៀនសូត្រគ្រប់ៗគ្នា កុំឱ្យពួកគាត់បោះបង់ការសិក្សា គោរពវិន័យ ជួយអប់រំកូនចៅឱ្យពួកគាត់មានសុជីវធម៌ សីលធម៌រស់នៅល្អ ដើម្បីក្លាយជាសិស្សគំរូរបស់សាលាតាមទិសស្លោក “កូនល្អ សិស្សល្អ មិត្តល្អ”។

នៅថ្ងៃទី២៨ ខែកញ្ញា ឆ្នាំ២០២៦នេះ នៅផ្សារទំនើប ហេរីថេកវ័ក ខេត្តសៀមរាប ស្ថានទូតអាមេរិកប្រចាំកម្ពុជា បានរៀបចំពិព័រណ៍ការសិក្សានៅសហរដ្ឋអាមេរិក ដើម្បីផ្តល់ឱកាសឱ្យនិស្សិតកម្ពុជា និងក្រុមគ្រួសារ ដើម្បីយល់ដឹងបន្ថែមអំពីកម្មវិធីសិក្សាថ្នាក់បរិញ្ញាបត្រ និង បរិញ្ញាបត្រជាន់ខ្ពស់ ក្នុងវិស័យអប់រំ វិទ្យាសាស្ត្រ និងបច្ចេកវិទ្យា និងបញ្ញាសិប្បនិម្មិត (AI) ការយល់ដឹងស៊ីជម្រៅ អំពីការបណ្តុះបណ្តាលស្តង់ដារអាមេរិក សម្រាប់អាជីពការងារនៅកម្ពុជា ព្រមទាំងទទួលបានសេចក្តីណែនាំជាផ្លូវការពីគោលនយោបាយ ទិដ្ឋាការសិស្ស និងតម្រូវការនានាដើម្បីចុះឈ្មោះចូលរៀន និងជួបផ្ទាល់ជាមួយតំណាង និងអតីតនិស្សិតមកពីគ្រឹះស្ថានឧត្តមសិក្សាល្បីៗនៅអាមេរិក។

ក្នុងឱកាសប្រារព្ធពិធីអបអរសាទរទិវាទេសចរណ៍ពិភពលោក ឆ្នាំ២០២៦ ក្រោមប្រធានបទ «របៀបវារៈឌីជីថល និងបញ្ញាសិប្បនិម្មិត ដើម្បីរៀបចំទេសចរណ៍ឡើងវិញ» នៅខេត្តសៀមរាប នារសៀលថ្ងៃទី២៧ ខែកញ្ញា ឆ្នាំ២០២៦ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានលើកទឹកចិត្តដល់ម្ចាស់អាជីវកម្ម និងម្ចាស់មូលដ្ឋានអាជីវកម្មទេសចរណ៍ទាំងអស់ ប្រឹងប្រែងប្រើប្រាស់ប្រព័ន្ធឌីជីថល និងការគ្រប់គ្រងទិន្នន័យ ដើម្បីវាយតម្លៃតម្រូវការ និងកែលម្អគុណភាពសេវាកម្មរបស់ខ្លួនឱ្យបានជាប់ជាប្រចាំ ដើម្បីពង្រឹងភាពប្រកួតប្រជែង ត្រៀមលក្ខណៈឱ្យបានល្អប្រសើរក្នុងការទទួលស្វាគមន៍ភ្ញៀវទេសចរក្នុងរដូវទេសចរណ៍មមាញឹក ក៏ដូចជាត្រៀមខ្លួនទទួលយកព្រឹត្តិការណ៍អន្តរជាតិធំៗនាពេលខាងមុខ។

នៅថ្ងៃទី២៧ ខែកញ្ញា ឆ្នាំ២០២៦ ឯកឧត្តម សែម រតនា ប្រធានក្រុមការងាររាជរដ្ឋាភិបាលចុះមូលដ្ឋានក្រុងរុនតាឯកតេជោសែន និងលោកជំទាវ បានដឹកនាំក្រុមការងារចូលរួមកាន់បិណ្ឌ និងនាំយកទេយ្យទាន និងថវិការបស់ ឯកឧត្តម នាយឧត្តមសេនីយ៍ ទៀ សីហា និងលោកជំទាវ ប្រគេនដល់វត្តចំនួន៦ រួមមាន វត្តតេជោរតនារាមវត្តកោះកែវមុន្នីរង្សី វត្តប្រាសាទព្រះបាទចៅស្រីវិបុលកេរ្តិ៍ វត្តជ័យគិរីមុន្នីរង្សី វត្តព្រះខ័នសែនជ័យ និងវត្តចន្ទគិរីភ្នំបូក ក្រុងរុនតាឯកតេជោសែន ខេត្តសៀមរាប។

នៅថ្ងៃទី២៧ ខែកញ្ញា ឆ្នាំ២០២៦ លោក ឌី រ៉ាដូ ប្រធានក្រុមការងារចុះមូលដ្ឋានឃុំកណ្ដែក តំណាង លោកជំទាវ តឹករ៉េត កំរ៉ង ប្រធានក្រុមការងាររាជរដ្ឋាភិបាលចុះមូលដ្ឋានស្រុកប្រាសាទបាគង បានដឹកនាំក្រុមការងារចូលរួមកាន់បិណ្ឌវេនទី១ នៅវត្តមហាអម្ពារាម ហៅវត្ដស្វាយធំ ឃុំសណ្ដែក ស្រុកប្រាសាទបាគង ខេត្តសៀមរាប។

ក្នុងស្មារតីរួមចំណែកគាំទ្រ និងលើកទឹកចិត្តដល់កងកម្លាំងប្រដាប់អាវុធ ដែលកំពុងបំពេញភារកិច្ចនៅសមរភូមិមុខ កាលពីរសៀលថ្ងៃទី២៧ ខែកញ្ញា ឆ្នាំ២០២៦នេះ លោកស្រី ធិវ រួន ចៅសង្កាត់ស្រង៉ែ និង លោកស្រី នួន គឹមសួរ ចៅសង្កាត់រងសាលាកំរើក ក្រុងសៀមរាប រួមនិងសប្បុរសជន បានបន្តនាំយកនូវស្បៀងអាហារ និងសម្ភារប្រើប្រាស់ចាំបាច់នានា ដែលបានពីការឧបត្ថម្ភរបស់សប្បុរសជន ប្រគល់ជូនកងកម្លាំងកងទ័ពយើង ដែលកំពុងឈរជើងបំពេញភារកិច្ចនៅសមរភូមិមុខ ក្នុងភូមិសាស្ត្រខេត្តព្រះវិហារ ទីតាំងទិសភ្នំខ្មោច (កងពលលេខ៧) និងទីតាំងវិស្វកម្មព្រះវិហារ។