ព័ត៌មានក្នុងខេត្ត

ទិដ្ឋភាពថ្ងៃរៀបលិចនៅទន្លេអុំ! ពេលព្រះអាទិត្យចាប់ផ្ដើមលិចបន្តិចម្ដងៗ ពន្លឺពណ៌មាសបានចាំងឆ្លុះលើផ្ទៃទឹកទន្លេអុំ បង្កើតបានជាទេសភាពដ៏ស្រស់ស្អាត និងស្ងប់ស្ងាត់គួរឱ្យចង់គយគន់។ ខ្យល់ត្រជាក់បក់ប៉ះស្លឹកឈើ រួមជាមួយទេសភាពធម្មជាតិជុំវិញ បានធ្វើឱ្យទីកន្លែងមួយនេះ ក្លាយជាគោលដៅដ៏ល្អសម្រាប់ការសម្រាកលំហែកាយ និងថតរូបអនុស្សាវរីយ៍។

នៅរសៀលថ្ងៃទី១០ ខែមិថុនា ឆ្នាំ២០២៦នេះ លោក អុឹង គឹមលាង អភិបាលរងខេត្តសៀមរាប បានដឹកនាំកិច្ចប្រជុំពិនិត្យ និងពិភាក្សាអំពីករណីសំណើសុំស្តារអូរចិញ្ចៀន ប្រវែង ៥គីឡូម៉ែត្រ ទទឹង ១៥ម៉ែត្រ និងជម្រៅ ៤ម៉ែត្រ ស្ថិតក្នុងភូមិតាភោគ និងភូមិគោកត្រាច ឃុំបាគង ស្រុកប្រាសាទបាគង ខេត្តសៀមរាប។ តាមរយៈសំណើរបស់មេភូមិតាភោគ និងភូមិគោកត្រាច បានបញ្ជាក់ថា មូលហេតុនៃការសុំស្ដារនេះ ដោយសារស្ថានភាពអូរចិញ្ចៀនបច្ចុប្បន្ននេះ មានសភាពគោករាក់ និងរួមតូចដោយកត្តាធម្មជាតិ ដែលធ្វើឱ្យខ្វះខាតទឹកប្រើប្រាស់នៅរដូវប្រាំង ប្រជាពលរដ្ឋក្នុងភូមិទាំង២ មានភូមិតាភោគ និងភូមិគោកត្រាច បានសំណូមសុំឱ្យមានការស្តារអូរចិញ្ចៀននេះឡើងវិញ។ ប្រយោជន៍សំខាន់នៃការស្ដារនេះ គឺរក្សាទឹកទុកសម្រាប់ប្រើប្រាស់ សម្រាប់ស្រោចស្រពស្រូវវស្សានិងដំណាំរួមផ្សំនានា ការរំដោះទឹកជំនន់ និងទប់ស្កាត់ការរំលោភយកដីចំណីអូរធ្វើជាកម្មសិទ្ធឯកជន។ ការស្តារអូរចិញ្ចៀននេះ មានភូមិសាស្ត្រនៅឃុំបាគង ដែលមានគ្រួសារទទួលផលសរុប ៣៩០គ្រួសារ។ ក្នុងឱកាសដឹកនាំកិច្ចប្រជុំ លោក អុឹង គឹមលាង អភិបាលរងខេត្ត បានណែនាំដល់អ្នកទទួលខុសត្រូវគម្រោង ត្រូវសហការជាមួយមន្ត្រីបច្ចេកទេស អាជ្ញាធរមូលដ្ឋាន ចុះសិក្សាលក្ខណបច្ចេកទេសឡើងវិញជាមុនសិន ដើម្បីមានមូលដ្ឋានលើការស្ដារ និងការរៀបចំប្លង់បច្ចេកទេសនៃការជួសជុល ឬការសាងសង់សំណង់សិល្បការ្យ ឱ្យបានច្បាស់លាស់ ស្របតាមតម្រូវការជាក់ស្ដែងរបស់ប្រជាពលរដ្ឋ និងស្របតាមនីតិវិធី គោលការណ៍ច្បាប់ និងលិខិតបទដ្ឋានគតិយុត្តនានាជាធរមាន។ ជាពិសេសត្រូវបញ្ចៀសបាននូវផលប៉ះពាល់បរិស្ថាន និងផ្ទៃអូរធម្មជាតិ និងធ្វើរបាយការណ៍លាយលក្ខណ៍អក្សរ លើកមតិយោបល់មករដ្ឋបាលខេត្ត ដើម្បីរដ្ឋបាលខេត្ត មានមូលដ្ឋានពិនិត្យ និងសម្រេច៕ អត្ថបទ និងរូបភាព៖ លោក ធន់ ពូថេ កែសម្រួល៖ លោក អ៊ុន ណារាជ្យ

វិញ្ញាបនបត្រសម្គាល់ម្ចាស់អចលនវត្ថុ ២ ៨៧៩បណ្ណ ក្នុងស្រុកប្រាសាទបាគង ត្រូវបានប្រគល់ជូនប្រជាពលរដ្ឋម្ចាស់កម្មសិទ្ធយកទៅប្រើប្រាស់តាមតម្រូវការ វិញ្ញាបនបត្រសម្គាល់ម្ចាស់អចលនវត្ថុចំនួន ២ ៨៧៩បណ្ណ លើក្បាលដីសរុប ៣ ៣៨៣ក្បាលដី ស្ថិតក្នុងលលៃ ភូមិស្ទឹង ភូមិគោកត្រាច ភូមិតាភោគ នៃឃុំបាគង ស្រុកប្រាសាទបាគង ខេត្តសៀមរាប ត្រូវបានប្រគល់ជូនបងប្អូនប្រជាពលរដ្ឋជាម្ចាស់កម្មសិទ្ធយកទៅប្រើប្រាស់តាមតម្រូវការ នៅរសៀលថ្ងៃទី១០ ខែមិថុនា ឆ្នាំ២០២៦នេះ ក្រោមវត្តមានចូលរួមពី ឯកឧត្តម សួស សុខចាន់ និង ឯកឧត្តម ឡុក ឡង់ឌី សមាជិកក្រុមប្រឹក្សាខេត្ត និង លោក ឌី រ៉ាដូ អភិបាលរងខេត្ត ដោយមានការចូលរួមពីអ្នកពាក់ព័ន្ធជាច្រើនរូបទៀត។ លោក ស៊ុន សុជាតិ អនុប្រធានមន្ទីររៀបចំដែនដីខេត្ត បានឱ្យដឹងថា បណ្ណកម្មសិទ្ធិដែលបានចេញជូននេះ គឺផ្តល់ជូនចំពោះតែក្បាលដីណាដែលមិនមានទំនាស់តវ៉ា មិនជាប់ពាក់ព័ន្ធនឹងបុរាណដ្ឋាន ឬតំបន់ថែរក្សាការពារដែលគ្រប់គ្រងដោយអាជ្ញាធរ និងមន្ទីរពាក់ព័ន្ធ។ ចំពោះក្បាលដីជាប់ពាក់ព័ន្ធទំនាស់ផ្សេងៗ គណៈកម្មការរដ្ឋបាលនឹងបន្តពិនិត្យដោះស្រាយតាមនីតិវិធីជាបន្តបន្ទាប់ ដើម្បីឈានដល់ការចេញបណ្ណជូនបន្តទៀត។ លោកអនុប្រធានមន្ទីរ បានឱ្យដឹងទៀតថា នៅក្នុងដំណើរការនាពេលនេះ ស្ថាប័នជំនាញបានសម្រេចការចេញបណ្ណកម្មសិទ្ធិជូនប្រជាពលរដ្ឋក្នុងភូមិទាំង៤ សរុបចំនួន ២ ៨៧៩បណ្ណ ក្នុងចំណោមក្បាលដីសរុប ៣ ៣៨៣ក្បាលដី។ ក្នុងនោះភូមិលលៃ បានចំនួន ២៦៦បណ្ណ, ភូមិស្ទឹង ៥៤៧បណ្ណ, ភូមិគោកត្រាច ១ ៥១០បណ្ណ និងភូមិតាភោគ បានចំនួន ៥៥៦បណ្ណ។ ឯកឧត្តម សួស សុខចាន់ សមាជិកក្រុមប្រឹក្សាខេត្ត មានប្រសាសន៍ថា រាជរដ្ឋាភិបាលកម្ពុជាក្រោមការដឹកនាំរបស់ សម្ដេចធិបតី ហ៊ុន ម៉ាណែត នាយករដ្ឋមន្រ្តី រួមនិងក្រសួងរៀបចំដែនដី និងរដ្ឋបាលខេត្តសៀមរាប បានយកចិត្តទុកដាក់បំផុតលើការអនុវត្តកិច្ចការដីធ្លី ដោយបានឧបត្ថម្ភគាំទ្រទាំងផ្នែកបច្ចេកទេស និងផ្នែកច្បាប់ក្នុងដំណើរការចុះបញ្ជីដីធ្លីនៅក្នុងភូមិសាស្ត្រខេត្តសៀមរាប ឱ្យមានភាពកាន់តែល្អប្រសើរឡើង ដើម្បីផ្តល់បណ្ណកម្មសិទ្ធិស្របច្បាប់ជូនដល់បងប្អូនប្រជាពលរដ្ឋជាម្ចាស់ដី។ បណ្ណកម្មសិទ្ធិនេះ គឺត្រូវបានការពារដោយច្បាប់ និងធានាដោយរដ្ឋ ហើយក៏គ្មានបុគ្គលណាមួយត្រូវបានគេដកហូតកម្មសិទ្ធិរបស់ខ្លួនបានទេ។ លោក ឌី រ៉ាដូ អភិបាលរងខេត្ត បានមានប្រសាសន៍ថា បច្ចុប្បន្នខេត្តសៀមរាប បានដំណើរការប្រកាសតំបន់វិនិច្ឆ័យតាមបណ្តាឃុំសង្កាត់ នៃក្រុងស្រុកទាំង១៣ ដែលបាននិងកំពុងអនុវត្តការចុះបញ្ជីដីមានលក្ខណៈជាប្រព័ន្ធទូទាំងខេត្ត ដើម្បីចុះបញ្ជីឱ្យបានគ្រប់ក្បាលដីតាមការកំណត់របស់រាជរដ្ឋាភិបាល។ លោកអភិបាលរងខេត្ត បញ្ជាក់ថា វិញ្ញាបនបត្រសម្គាល់ម្ចាស់អចលនវត្ថុ ជាឯកសារគតិយុត្តមួយដែលគ្មានអាយុកាល និងមានតម្លៃសម្រាប់រដ្ឋ ក៏ដូចជាប្រជាពលរដ្ឋជាម្ចាស់ដី និងអ្នកកាន់កាប់ដីទទួលបាននូវសារៈប្រយោជន៍ ដូចជា រដ្ឋគ្រប់គ្រងដីធ្លី ទាំងដីរដ្ឋ និងដីឯកជន ងាយស្រួលក្នុងការងាររៀបចំដែនដី និងរដ្ឋបាលដីធ្លី ការបែងចែកដី ការលើកស្ទួយកម្រិតជីវភាពរស់នៅរបស់ប្រជាពលរដ្ឋ កាត់បន្ថយបាននូវវិវាទដីធ្លី ធានាសុវត្ថិភាពក្នុងការកាន់កាប់ដីធ្លីនិង ទទួលបាននូវសិទ្ធិស្របច្បាប់ក្លាយជាម្ចាស់ដីពិតប្រាកដដែលត្រូវបាន ការពារដោយច្បាប់ និងធានាដោយរដ្ឋ។ ប្រជាពលរដ្ឋអាចប្រើប្រាស់ បណ្ណកម្មសិទ្ធិ ដើម្បីផលប្រយោជន៍ ផ្សេងៗក្នុងការប្រកបមុខរបរ ឬអាជីវកម្មលើ ដីធ្លីរបស់ខ្លួនដោយគ្មានការព្រួយបារម្ភ៕ អត្ថបទ និងរូបភាព៖ លោក ឡៃ បញ្ញា កែសម្រួល៖ លោក អ៊ុន ណារាជ្យ

ប្រជាពលរដ្ឋនៅឃុំសង្វើយ ស្រុកជីក្រែង រីករាយនឹងសមិទ្ធផលផ្លូវបេតុងថ្មី និងការបំពាក់ភ្លើងបំភ្លឺផ្លូវ បានជួយសម្រួលដល់ការធ្វើដំណើរ និងជាកត្តាជំរុញដ៏សំខាន់ក្នុងការលើកកម្ពស់សេដ្ឋកិច្ចមូលដ្ឋាន។ សូមថ្លែងអំណរគុណ ឯកឧត្តម ប្រាក់ សោភ័ណ អភិបាលខេត្តសៀមរាប និងអាជ្ញាធរមូលដ្ឋាន សម្រាប់ការផ្ដល់ជូននូវសមិទ្ធផលថ្មីជូនប្រជាពលរដ្ឋ។

លោក ង៉ូវ សេងកាក់ អភិបាលរងខេត្តសៀមរាប តំណាង ឯកឧត្តម ប្រាក់ សោភ័ណ អភិបាលខេត្ត បានដឹកនាំគណៈប្រតិភូខេត្តសៀមរាប ចូលរួមសន្និសីទថ្នាក់ដឹកនាំទីក្រុងអាស៊ាន (ASEAN City Leaders Conference) សន្និសីទនេះរៀបចំរួមគ្នាដោយទីក្រុងហាណូយ និងក្រសួងការបរទេសវៀតណាម នាថ្ងៃទី៧-១០ ខែមិថុនា ឆ្នាំ២០២៦កន្លងទៅនេះ ដោយមានការគាំទ្រពីលេខាធិការដ្ឋានអាស៊ាន និងវិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា។ សូមជម្រាបថា សន្និសីទថ្នាក់ដឹកនាំទីក្រុងអាស៊ាន ដោយផ្តោតលើអភិបាលកិច្ចឆ្លាតវៃ និងការអភិវឌ្ឍទីក្រុងប្រកបដោយនិរន្តរភាព ក្រោមប្រធានបទ “ជំរុញអនាគតតាមរយៈទីក្រុងឆ្លាតវៃ និរន្តរភាព និងការតភ្ជាប់គ្នា” ដោយមានការចូលរួមពីថ្នាក់ដឹកនាំទីក្រុង អ្នកជំនាញ និងតំណាងអង្គការអន្តរជាតិប្រមាណ ៣៥០នាក់ ដើម្បីពិភាក្សា និងផ្លាស់ប្តូរបទពិសោធន៍អំពីអភិបាលកិច្ចទីក្រុងក្នុងបរិបទនៃការអភិវឌ្ឍយ៉ាងឆាប់រហ័សរបស់តំបន់អាស៊ាន។ កិច្ចពិភាក្សាសំខាន់ៗបានផ្តោតលើការអភិវឌ្ឍទីក្រុងក្នុងយុគសម័យឌីជីថល ការប្រើប្រាស់បញ្ញាសិប្បនិម្មិត (AI) ដើម្បីបង្កើនប្រសិទ្ធភាពនៃការគ្រប់គ្រង និងការផ្តល់សេវាសាធារណៈ ព្រមទាំងការកសាងទីក្រុងបៃតងដែលអាចទប់ទល់នឹងការប្រែប្រួលអាកាសធាតុ។ ក្រៅពីការពិភាក្សា សន្និសីទនេះក៏មានគោលបំណងពង្រឹងកិច្ចសហប្រតិបត្តិការរវាងទីក្រុងនានាក្នុងអាស៊ាន ជំរុញការអនុវត្តចក្ខុវិស័យសហគមន៍អាស៊ានឆ្នាំ ២០៤៥ និងបង្កើនទំនាក់ទំនងសេដ្ឋកិច្ច ពាណិជ្ជកម្ម ទេសចរណ៏និងវប្បធម៌ក្នុងតំបន់។ តាមរយៈសន្និសីទនេះដែរ គណៈប្រតិភូខេត្តសៀមរាប ក៏បានជួបពិភាក្សាការងារជាមួយ ឯកឧត្តម Nguyen Loc Ha អនុប្រធានអចិន្ត្រៃយ៍នៃគណៈកម្មាធិការប្រជាជនទីក្រុងហូជីមិញ ផ្តោតលើការជំរុញកិច្ចសហប្រតិបត្តិការលើវិស័យសំខាន់ៗមួយចំនួន រួមមាន៖ វិស័យទេសចរណ៍ តាមរយៈការរៀបចំកម្មវិធីផ្សព្វផ្សាយរួម និងការតភ្ជាប់គោលដៅទេសចរណ៍រវាងទីក្រុងហូជីមិញ និងខេត្តសៀមរាប។ ជាពិសេសការជំរុញការវិនិយោគ និងពាណិជ្ជកម្ម ដោយលើកទឹកចិត្តសហគ្រាស និងវិនិយោគិនពីទីក្រុងហូជីមិញ មកស្វែងយល់ពីសក្តានុពលវិនិយោគនៅខេត្តសៀមរាប លើវិស័យកសិកម្មទំនើប ពាណិជ្ជកម្ម ឧស្សាហកម្មកែច្នៃ សេវាកម្ម និងហេដ្ឋារចនាសម្ព័ន្ធ ព្រមទាំងការអភិវឌ្ឍធនធានមនុស្ស តាមរយៈការបណ្តុះបណ្តាលមន្ត្រីរាជការ ការបណ្តុះបណ្តាលជំនាញវិជ្ជាជីវៈ និងការផ្លាស់ប្តូរបច្ចេកវិទ្យា និងនវានុវត្តន៍ រួមនឹងការអនុវត្តរដ្ឋបាលឌីជីថល ការផ្តល់សេវាសាធារណៈតាមប្រព័ន្ធឌីជីថល និងការកសាងទីក្រុងឆ្លាតវៃ។ ក្រោមកិច្ចសម្របសម្រួលពីប្រធានគណៈកម្មាធិការប្រជាជនទីក្រុងហាណូយ ថ្នាក់ដឹកនាំគណៈប្រតិភូទីក្រុងអាស៊ាន ក៏បានចូលជួបសំដែងការគួរសមជាមួយ ឯកឧត្តម Tran Thanh Man ប្រធានរដ្ឋសភានៃសាធារណៈរដ្ឋសង្គមនិយមវៀតណាម។ នៅក្នុងជំនួបនោះ តំណាងថ្នាក់ដឹកនាំទីក្រុងអាស៊ាន រួមមានថ្នាក់ដឹកនាំនៃខេត្តហ្លួងប្រាបាង្គ រដ្ឋបាលតំបន់ម៉ានដាទ្បេ និង ប្រតិភូខេត្តសៀមរាប បានសម្តែងការអរគុណចំពោះការទទួលស្វាគមន៍យ៉ាងកក់ក្តៅ និងប្រកបដោយកិត្តិយសពីរដ្ឋសភា និងស្ថាប័ននានារបស់វៀតណាម។ គណៈប្រតិភូបានវាយតម្លៃខ្ពស់ចំពោះសន្និសីទមេដឹកនាំទីក្រុងអាស៊ាន ដោយចាត់ទុកវាជាវេទិកាដ៏សំខាន់មួយសម្រាប់ទីក្រុងនានា ក្នុងការផ្លាស់ប្តូរបទពិសោធន៍ ចែករំលែកគំរូអភិវឌ្ឍន៍ដែលមានប្រសិទ្ធភាព និងជំរុញកិច្ចសហប្រតិបត្តិការ៕ អត្ថបទ និងរូបភាព៖ លោក អ៊ុន ណារាជ្យ

អាជ្ញាធរជាតិអប្សរា និងអាជ្ញាធរជាតិសំបូរព្រៃគុក បានចេញសេចក្តីប្រកាសព័ត៌មានស្តីពីលទ្ធផលនៃកិច្ចប្រជុំបច្ចេកទេសលើកទី៤២ នៃអាយស៊ីស៊ី-អង្គរ/សំបូរព្រៃគុក ដែលបានប្រព្រឹត្តទៅនៅខេត្តសៀមរាប។ លទ្ធផលសំខាន់ៗរួមមាន៖ ការសម្តែងក្តីបារម្ភលើផលប៉ះពាល់ដល់បេតិកភណ្ឌពីការប៉ះទង្គិចគ្នានៅតាមព្រំដែនកម្ពុជា-ថៃ, ការបន្តគាំទ្រថវិកា ៩០០,០០០ ដុល្លារ ពីជប៉ុនសម្រាប់ប្រាសាទបាយ័ន និង ២៥០,០០០ ដុល្លារ ពីអាមេរិកសម្រាប់ប្រាសាទភ្នំបាខែង។ ក្រៅពីនេះ គម្រោងជួសជុលប្រាសាទមេបុណ្យខាងលិច (ឧបត្ថម្ភដោយបារាំង ១២លានអឺរ៉ូ) នឹងត្រូវបញ្ចប់ និងសម្ពោធក្នុងខែវិច្ឆិកា ឆ្នាំ២០២៦ ស្របពេលជាមួយគ្នានឹងកិច្ចប្រជុំកំពូលហ្វ្រង់កូហ្វូនីលើកទី២០។ កិច្ចប្រជុំក៏បានបង្ហាញពីវឌ្ឍនភាពលើការរៀបចំផែនការគ្រប់គ្រងដីធ្លី សំណង់ និងការគ្រប់គ្រងទឹកក្នុងតំបន់អង្គរផងដែរ។

សហរដ្ឋអាមេរិកប្រកាសផ្តល់ថវិកា ២៥ម៉ឺនដុល្លារ បន្ថែមដល់កម្ពុជា ដើម្បីបន្តការងារការអភិរក្ស និងជួសជុលប្រាសាទភ្នំបាខែង

រដ្ឋបាលខេត្តសៀមរាប បានបើកកិច្ចប្រជុំផ្សព្វផ្សាយ ផែនការអភិវឌ្ឍប្រព័ន្ធស្បៀងអាហារប្រកបដោយសុវត្ថិភាព និងនិរន្តរភាព ក្នុងគោលបំណងធានាសន្តិសុខស្បៀង លើកកម្ពស់អាហារូបត្ថម្ភ និងធានាសុវត្ថិភាពចំណីអាហារជូនប្រជាពលរដ្ឋ។ ផែនការយុទ្ធសាស្ត្រ ៥ឆ្នាំនេះ ត្រូវការកិច្ចសហការយ៉ាងស្អិតរមួតរវាងស្ថាប័នរដ្ឋ វិស័យឯកជន ដៃគូអភិវឌ្ឍន៍ និងសហគមន៍ ដោយមានការគាំទ្រផ្នែកបច្ចេកទេសពីអង្គការហ្គ្រេត (GRET) ដើម្បីលើកកម្ពស់សុខុមាលភាព និងគុណភាពជីវិតរបស់ប្រជាពលរដ្ឋក្នុងខេត្ត។

លោក សុខ ថុល អភិបាលរងខេត្តសៀមរាប បានទទួលជួបពិភាក្សាការងារជាមួយគណៈប្រតិភូក្រុមហ៊ុន Hainan Development Holdings មកពីប្រទេសចិន ដើម្បីសិក្សា និងពង្រឹងកិច្ចសហប្រតិបត្តិការលើការតភ្ជាប់ជើងហោះហើរត្រង់។ ជំនួបនេះផ្តោតលើការហោះហើររវាងភ្នំពេញ-ហៃគូ និងការសិក្សាបន្ថែមសម្រាប់ផ្លូវហោះហើរ សៀមរាប-ហៃគូ តាមរយៈអនុស្សរណៈយោគយល់គ្នារវាងក្រុមហ៊ុនអាកាសចរណ៍ Air Cambodia និងអាកាសយានដ្ឋានអន្តរជាតិហៃណាន ក្នុងគោលបំណងជំរុញ និងផ្លាស់ប្តូរវិស័យទេសចរណ៍រវាងកម្ពុជា និងខេត្តហៃណាន។

មន្ទីរផែនការខេត្តសៀមរាប បើកកិច្ចប្រជុំស្ដីពីការបំពេញទិន្នន័យរដ្ឋបាលរបស់មន្ទីរអង្គភាព ដើម្បីចងក្រង វិភាគទិន្នន័យស្ថិតិរដ្ឋបាលនៅថ្នាក់ក្រោមជាតិតាមវិស័យនីមួយៗ

«អង្គការគោសប្បុរសដើម្បីកម្ពុជា» បានរួមចំណែកកាត់បន្ថយភាពក្រីក្រជូនប្រជាពលរដ្ឋចំនួន៥ស្រុក តាមរយៈការផ្ដល់ពូជគោ ដែលអង្គការនេះបានបង្កើតឡើងរយៈពេល១១ឆ្នាំមកហើយ

ក្នុងន័យចូលរួមលើកកម្ពស់អភិបាលកិច្ចល្អក្នុងការផ្តល់សេវាសាធារណៈ និងការអភិវឌ្ឍនៅថ្នាក់ក្រោមជាតិ ការិយាល័យប្រជាពលរដ្ឋខេត្តសៀមរាប បានបន្តចុះធ្វើការផ្សព្វផ្សាយពីតួនាទី ភារកិច្ច និងសមត្ថកិច្ចរបស់ការិយាល័យប្រជាពលរដ្ឋរាជធានីខេត្ត ព្រមទាំងរបៀបប្រើប្រាស់កម្មវិធីទូរស័ព្ទដៃ «មតិយើង» ជូនដល់សាស្ត្រាចារ្យ និងនិស្សិតនៃសាកលវិទ្យាល័យនានាក្នុងក្រុងសៀមរាប តបតាមការណែនាំរបស់ក្រសួងមហាផ្ទៃ និងការចង្អុលបង្ហាញរបស់ ឯកឧត្តម លី សំរិទ្ធ ប្រធានក្រុមប្រឹក្សាខេត្ត។