ក្នុងកិច្ចខិតខំប្រឹងប្រែងរួមចំណែកលើកកម្ពស់វិស័យអប់រំ និងជួយសម្រាលបន្ទុកជីវភាពប្រជាពលរដ្ឋនៅតំបន់ជនបទ មូលនិធិ Bike to School Singapore តាមរយៈលោក ឆែម ពេ និងលោកស្រី មាឃ សុខម៉ាលី ប្រធានមូលនិធិ Bike to School Cambodia នៅថ្ងៃទី១៤ ខែវិច្ឆិកា ឆ្នាំ២០២៦ បានរៀបចំពិធីប្រគល់កង់ចំនួន ៥០២គ្រឿង សម្រាប់ឆ្នាំសិក្សា ២០២៦-២០២៧ ជូនដល់សិស្សានុសិស្សក្រីក្រមកពីគ្រឹះស្ថានសិក្សាចំនួន ៤៨ ក្នុងស្រុកក្រឡាញ់ និងតំបន់ជុំវិញ។

ក្នុងន័យដើម្បីចូលរួមក្នុងការងារមនុស្សធម៌ និងជួយសង្គ្រោះដល់អាយុជីវិតកុមារកម្ពុជា សាលាអន្តរជាតិ International School of Siem Reap នៅថ្ងៃទី១៤ ខែវិច្ឆិកា ឆ្នាំ២០២៦នេះ បានរៀបចំកម្មវិធីពិព័រណ៍សប្បុរសធម៌ប្រចាំឆ្នាំក្នុងគោលបំណងប្រមូល និងកៀរគរថវិកាជូនដល់មន្ទីរពេទ្យគន្ធបុប្ផា និងមន្ទីរពេទ្យកុមារអង្គរខេត្តសៀមរាប។

ដើម្បីលើកកម្ពស់វិស័យកីឡាប្រណាំងទូកឱ្យកាន់តែមានភាពទាក់ទាញ និងមានស្ដង់ដារខ្ពស់ គណៈកម្មការរៀបចំការប្រកួតកីឡាប្រណាំងទូកខេត្តសៀមរាប នៅរសៀលថ្ងៃទី១៣ ខែវិច្ឆិកា ឆ្នាំ២០២៦ បានបើកកិច្ចប្រជុំពិភាក្សាលម្អិតលើផែនការបច្ចេកទេស កាលវិភាគប្រកួត និងការពង្រឹងវិន័យកីឡាករ សម្រាប់ការប្រកួតទូកទាំង ៣ ប្រភេទ រួមមាន ទូកង ទូកនាគ និងទូកផ្កាចារ។

នាថ្ងៃទី១៣ ខែវិច្ឆិកា ឆ្នាំ២០២៦ ក្រុមប្រឹក្សាកិច្ចការវត្តអារាមក្នុងឧទ្យានអង្គរ បានបើកកិច្ចប្រជុំស្ដីពីលទ្ធផលវឌ្ឍនភាពការងារប្រចាំឆ្នាំ ក្រោមព្រះវត្តមានរបស់ ព្រះធម្មសិរី ជុំ គឹមឡេង ព្រះមេគណខេត្តសៀមរាប និងជាប្រធានក្រុមប្រឹក្សាកិច្ចការវត្តអារាមក្នុងឧទ្យានអង្គរ, ព្រះអរិយកស្សប នង មាណវោ ប្រធានកិត្តិយសក្រុមប្រឹក្សាកិច្ចការវត្តអារាមក្នុងឧទ្យានអង្គរ និង លោក លី សារី អភិបាលរងខេត្ត និងមានការនិមន្តចូលរួមពីមន្ត្រីសង្ឃគ្រប់ឋានានុក្រម ព្រះចៅអធិការវត្តទាំង១៦ ក្នុងឧទ្យានអង្គរ និងសមាជិកសមាជិកា នៃក្រុមប្រឹក្សាកិច្ចការវត្តអារាមក្នុងឧទ្យានអង្គរជាច្រើនអង្គ/នាក់។

កសិកររស់នៅឃុំតាយ៉ែន ស្រុកសូទ្រនិគម ខេត្តសៀមរាប កំពុងចាប់ផ្ដើមប្រមូលផលស្រូវវស្សារបស់ខ្លួនជាបណ្ដើរៗ ដោយក្នុងរដូវកាលនេះ ទោះបីជាទិន្នផលស្រូវទទួលបានក្នុងកម្រិតមធ្យមក៏ដោយ ប៉ុន្តែតម្លៃស្រូវមានភាពល្អប្រសើរជាងឆ្នាំមុន ដែលជាកម្លាំងចិត្ត និងជួយសម្រួលដល់ជីវភាពគ្រួសារកសិករបានមួយកម្រិត។

ក្រោមកិច្ចសហការជាមួយអាជ្ញាធរមូលដ្ឋាន និងអង្គការ Hands For Cambodia និងមានការគាំទ្រពីអង្គការស្ម័គ្រចិត្តកសាងកម្ពុជា បានផ្ដល់ផ្ទះជូនដល់គ្រួសារប្រជាពលរដ្ឋក្រីក្រ ១៦គ្រួសារ នៅក្នុងភូមិពាក់ស្នែង ឃុំពាក់ស្នែងចាស់ ស្រុកអង្គរធំ ខេត្តសៀមរាប រួមនឹងសម្ភារប្រើប្រាស់មួយចំនួន ដើម្បីជួយលើកកម្ពស់ជីវភាពរស់នៅរបស់ប្រជាពលរដ្ឋក្នុងសហគមន៍ ដែលពិធីប្រគល់ធ្វើឡើងនៅព្រឹកថ្ងៃទី១៣ ខែវិច្ឆិកា ឆ្នាំ២០២៦នេះ។