នៅថ្ងៃទី៣១ ខែតុលា ឆ្នាំ២០២៦ ក្រុមការងាររាជរដ្ឋាភិបាលចុះមូលដ្ឋានស្រុកអង្គរធំ ខេត្តសៀមរាប បានអញ្ជើញជួបសំណេះសំណាល និងពិសារបាយសាមគ្គីជាមួយយុវជន យុវនារី ដែលស្ម័គ្រចិត្ដចំនួន ៣០នាក់ នៅក្នុងស្រុកអង្គរធំ ដែលបានចូលបំពេញកាតព្វកិច្ចយោធាក្នុងឆ្នាំ២០២៦ ដើម្បីបង្កើនភាពស្និទ្ធស្នាល និងលើកទឹកចិត្តដល់យុវជនដែលបានចូលរួមបំពេញកាតព្វកិច្ចយោធា ក្នុងការពង្រឹងខឿនការពារជាតិ។

ឯកសារវិនិច្ឆ័យដីធ្លីចំនួន ៦៦៣ ក្បាលដី ក្នុងភូមិពោធិ និងភូមិទ្រាយ ឃុំពោធិ៍ទ្រាយ ស្រុកពួក ខេត្តសៀមរាប ត្រូវបានបិទផ្សាយជាសាធារណៈ ដើម្បីឱ្យប្រជាពលរដ្ឋ រួមនឹងអ្នកពាក់ព័ន្ធចូលរួមពិនិត្យ ផ្ទៀងផ្ទាត់ និងស្នើសុំកែតម្រូវ ក្នុងពិនិត្យឃើញមានកំហុសឆ្គង ដែលការបិទផ្សាយនេះជាឱកាសចុងក្រោយដែលអាចកែតម្រូវ មានរយៈពេល ១៥ថ្ងៃ ចាប់ពីថ្ងៃទី៣០ ខែតុលា ដល់ទី១៣ ខែវិច្ឆិកា ឆ្នាំ២០២៦ នៅក្នុងបរិវេណអនុវិទ្យាល័យពោធិ៍ទ្រាយ។

មន្ទីរកសិកម្ម រុក្ខាប្រមាញ់ និងនេសាទខេត្តសៀមរាប សហការជាមួយវិស័យឯកជន នៅថ្ងៃទី៣០ ខែតុលា ឆ្នាំ២០២៦ បានរៀបចំសិក្ខាសាលាបច្ចេកទេសស្តីពី «NPK កាម៉ៅ-បច្ចេកវិទ្យាប៉ូលីផូស្វាត សម្រាប់ការដាំដុះស្រូវនៅក្នុងខេត្តសៀមរាប» ក្នុងគោលបំណងចែករំលែកចំណេះដឹង បទពិសោធន៍ និងបច្ចេកទេសថ្មីៗ ព្រមទាំងណែនាំអំពីការប្រើប្រាស់ជី និងបច្ចេកវិទ្យាទំនើបក្នុងវិស័យកសិកម្ម ដើម្បីជួយឱ្យកសិករអាចអនុវត្តការដាំដុះប្រកបដោយប្រសិទ្ធភាព បង្កើនទិន្នផល និងលើកកម្ពស់គុណភាពផលិតផលកសិកម្ម។

សិក្ខាកាមជាយុវជនចំនួន ២០០នាក់ នៅក្នុងខេត្តសៀមរាប បានបញ្ចប់វគ្គបណ្តុះបណ្តាលផ្នែកបដិសណ្ឋារកិច្ច លើជំនាញចំនួន៤ ដែលរៀបចំឡើងដោយសមាគមក្លឹបទេសចរណ៍សៀមរាប (STC) ក្រោមការគាំទ្រសហហិរញ្ញប្បទានពីមូលនិធិអភិវឌ្ឍន៍ជំនាញ នៃក្រសួងសេដ្ឋកិច្ច និងហិរញ្ញវត្ថុ និងអនុញ្ញាតឱ្យប្រើប្រាស់កម្មវិធីបង្រៀនស្របតាមស្ដង់ដារ “អាស៊ាន” មានរយៈពេល៤ខែ ដែលបានចាប់ផ្ដើមពីថ្ងៃទី១ ខែមីនា និងបិទបញ្ចប់នៅថ្ងៃទី៣០ ខែតុលា ឆ្នាំ២០២៦នេះ ក្រោមអធិបតីភាព ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍។

នៅថ្ងៃទី៣០ ខែតុលា ឆ្នាំ២០២៦នេះ ក្រសួងទេសចរណ៍ បានរៀបចំវេទិកាផ្គូផ្គង ឱកាសការងារក្នុងវិស័យទេសចរណ៍ឆ្នាំ២០២៦ (Employment Matching Forum 2026) នៅសាលាសណ្ឋាគារ និងទេសចរណ៍ ប៉ូល ឌុយប្រ៊ូល ក្រុងសៀមរាប ដោយវេទិកានេះ មានការចូលរួមពីក្រុមហ៊ុនប្រមាណ១០០ ផ្ដល់ឱកាសការងារប្រមាណ ៥ ០០០ កន្លែង សម្រាប់យុវជន និងអ្នកស្វែងរកការងារក្នុងវិស័យទេសចរណ៍ និងបដិសណ្ឋារកិច្ច។

នៅថ្ងៃទី៣០ ខែតុលា ឆ្នាំ២០២៦នេះ មន្ទីរប្រៃសណីយ៍ និងទូរគមនាគមន៍ខេត្តសៀមរាប ដោយមានកិច្ចសហការជាមួយរដ្ឋបាលខេត្ត បានរៀបចំប្រជុំពិភាក្សា ស្ដីពី «ការប្រមូលទិន្នន័យសម្រាប់រៀបចំសូចនាករក្នុងវិស័យប្រៃសណីយ៍ ទូរគមនាគមន៍ និងបច្ចេកវិទ្យាគមនាគមន៍ និងព័ត៌មាន» ជូនដល់អ្នកពាក់ព័ន្ធក្នុងខេត្តសៀមរាប ជាពិសេសរដ្ឋបាលក្រុងស្រុក ឃុំសង្កាត់ ក្នុងគោលបំណងពង្រឹងគុណភាព និងភាពត្រឹមត្រូវនៃទិន្នន័យស្ថិតិ ដើម្បីឆ្លើយតបទៅនឹងតម្រូវការជាក់ស្ដែងក្នុងការតាមដាន វាយតម្លៃ និងរៀបចំគោលនយោបាយអភិវឌ្ឍន៍សេដ្ឋកិច្ច និងសង្គមឌីជីថលនៅកម្ពុជា។