មន្ទីរពេទ្យបង្អែកក្រឡាញ់ ស្ថិតក្នុងស្រុកក្រឡាញ់ ខេត្តសៀមរាប បាននិងកំពុងបំពេញបេសកកម្មយ៉ាងសកម្មក្នុងការផ្តល់សេវាសុខាភិបាល ដោយគ្របដណ្តប់លើមូលដ្ឋានស្រុកចំនួនពីរ គឺស្រុកក្រឡាញ់ និងស្រុកស្រីស្នំ ដែលមានប្រជាពលរដ្ឋសរុបប្រមាណ ១២០ ៨៨៨នាក់ មកទទួលសេវានៅមន្ទីរពេទ្យនេះ។ ដើម្បីឆ្លើយតបទៅនឹងតម្រូវការសុខភាពរបស់ប្រជាពលរដ្ឋ មន្ទីរពេទ្យបានរៀបចំ និងពង្រីកសេវាកម្មរបស់ខ្លួនយ៉ាងសម្បូរបែប រួមមាន៖សេវាពិនិត្យ និងព្យាបាលទូទៅ៖ ផ្នែកជំងឺក្រៅ ជំងឺកុមារ ជំងឺទូទៅសម្រាប់មនុស្សពេញវ័យ ព្រមទាំងសេវាវះកាត់ និងផ្នែកសម្ភពរោគស្ត្រី។ សេវាឯកទេស និងជំងឺរ៉ាំរ៉ៃ៖ ពិគ្រោះនិងព្យាបាលជំងឺទឹកនោមផ្អែម ជំងឺលើសឈាម ជំងឺផ្លូវចិត្ត ជំងឺភ្នែក និងកម្មវិធីព្យាបាលជំងឺរបេង។ សូមអញ្ជើញទស្សនាវីដេអូបទយកការណ៍ទាំងស្រុងដូចតទៅ៖

មណ្ឌលសុខភាព ស្រែណូយ ស្ថិតនៅក្នុងឃុំស្រែណូយ ស្រុកវ៉ារិន ខេត្តសៀមរាប។ មណ្ឌលសុខភាពនេះ បាននឹងកំពុងអភិវឌ្ឍខ្លួនជាបន្តបន្ទាប់ឥតឈប់ឈរ ដើម្បីលើកកម្ពស់ការផ្តល់សេវាថែទាំសុខភាពជូនប្រជាពលរដ្ឋឱ្យកាន់តែមានគុណភាព សុវត្ថិភាព និងប្រសិទ្ធភាពខ្ពស់។ តាមរយៈកិច្ចខិតខំប្រឹងប្រែងប្រកបដោយស្មារតីទទួលខុសត្រូវ កាលពីពេលថ្មីៗនេះ មណ្ឌលសុខភាព ស្រែណូយ ទទួលបានជ័យលាភីចំណាត់ថ្នាក់លេខ ៤ ជា «អង្គភាពផ្តល់សេវាសាធារណៈគំរូ» ក្នុងវិស័យសុខាភិបាល ឆ្នាំ២០២៥។

នៅក្នុង​ឆ្នាំ២០២៦នេះ រដ្ឋបាល​ឃុំ​ខ្នាត ​សាងសង់ផ្លូវបេតុងអាមេមួយខ្សែប្រវែង៦៤០ម៉ែត្រ ទទឹង៤.៥ម៉ែត្រ និង​មាន​កម្រាស់១.៥តឹក។ ផ្លូវ​នេះ​ត្រូវបាន​ស្ថាបនាឡើង​ក្រោម​កញ្ចប់ថវិកាមូលនិធិឃុំ-សង្កាត់ ដែល​រាជរដ្ឋាភិបាល​បាន​វិភាជដល់​ថ្នាក់​ក្រោម​ជាតិ​ដើម្បីអភិវវឌ្ឍមូលដ្ឋានឱ្យ​មានការរីកចម្រើន។ ក្រោ​មការ​ដឹកនាំ និង​ការ​ចង្អុលបង្ហាញ របស់ឯកឧត្តម ប្រាក់ សោភ័ណ អភិបាល​ខេត្ត​សៀមរាប ឆ្នាំ២០២៦នេះ តាមបណ្តាឃុំ​សង្កាត់នានានៅទូទាំង​ខេត្តសៀមរាប បាន​ចាប់ផ្តើ​ម​កសាង​ផ្លូវ​បេតុង ជំនួសឱ្យ​ការ​សាងសង់ផ្លូវ​ដីស និង​ដីក្រហមវិញ។

ប្រជាពលរដ្ឋរស់នៅអមសងខាងផ្លូវ នៅក្នុងភូមិបន្ទាយចាស់ សង្កាត់ស្លក្រាម ក្រុងសៀមរាប សម្តែងក្តីត្រេចអរ រំភើបរីករាយ ក្រោយទទួលបានអំណោយផ្លូវបេតុងមួយខ្សែ ពីឯកឧត្តម ប្រាក់ សោភ័ណ អភិបាល នៃគណអភិបាលខេត្តសៀមរាប។ ផ្លូវបេតុងថ្មីមួយខ្សែនេះមានប្រវែង១៧០ម៉ែត្រ ទទឹង៦ម៉ែត្រ និងមានលូមុខកាត់ចំនួន១ម៉ែត្រ។ ផ្លូវនេះត្រូវបានចាប់ផ្តើមសាងសង់នៅថ្ងៃទី១៦ ខែកក្កដា ឆ្នាំ២០២៦ និងបានបញ្ចប់រួចរាល់នៅថ្ងៃទី២៥ ខែកក្កដា ឆ្នាំ២០២៦នេះ។

ផលិតដោយ៖ មន្ទីរព័ត៌មានខេត្តសៀមរាប

រាជរដ្ឋាភិបាលកម្ពុជា បាន​រៀបចំកម្មវិធីកែទម្រង់​ការគ្រប់គ្រងហិរញ្ញវត្ថុសាធារណៈ ដែលជា​កម្មវិធី​កែទម្រង់​ស្នូល​មួយ​នៃកម្មវិធី​កែទម្រង់សំខាន់ៗ ដើម្បី​ពង្រឹង​អភិបាលកិច្ច និងទ្រទ្រង់​ការអភិវឌ្ឍសេដ្ឋកិច្ច ប្រកបដោយ​បរិយាប័ន្ន និង សមធម៌ ដូចមាន​កំណត់ក្នុងយុទ្ធសាស្រ្តចតុកោណ និង ផែនការ​យុទ្ធសាស្រ្តអភិវឌ្ឍន៍ជាតិ។ កម្មវិធីកែទម្រង់នេះ មាន​ចក្ខុវិស័យ​ប្រកប​ដោយ​មហិច្ឆិតា និង​ប្រាកដនិយម ពោល​គឺកសាង​ប្រព័ន្ធ​គ្របគ្រង​ហិរញ្ញវត្ថុ​សាធារណៈកម្ពុជា ឱ្យ​ស្រប​តាម​ឧត្តមានុវត្តន៍អន្តរជាតិ ដែល​ជា​​ប្រព័ន្ធ​ផ្ដោត​លើ​ធាតុ​ចេញ ឬ លទ្ធផល និង វិមជ្ឈការ។ កម្មវិធីកែទម្រង់នេះ ត្រូវបានបែងចែកជា៤ដំណាក់កាលរួមមាន៖ ដំណាក់កាលទី១ ចាប់ពីឆ្នាំ២០០៤ ដល់ ២០០៨ ដោយផ្តោតលើការកសាងភាពជឿទុកចិត្តនៃថវិកា, ដំណាក់កាលទី២ ចាប់ពីឆ្នាំ២០០៩ ដល់ ២០១៥ ដោយផ្ដោតលើការកសាងគណនេយ្យភាពហិរញ្ញវត្ថុ, ដំណាក់កាលទី៣ ចាប់ពីឆ្នាំ២០១៦ ដល់ ២០២២ ដោយផ្តោតលើការផ្សារភ្ជាប់ថវិកាទៅនឹងគោលនយោបាយ និង ដំណាក់កាលទី៤ ចាប់ពីឆ្នាំ២០២៣ ដល់ ២០២៧ ដោយផ្តោតលើការកសាងគណនេយ្យភាពសមិទ្ធកម្ម ដែលមានន័យថា ជាការទទួលខុសត្រូវលើលទ្ធផលចុងក្រោយ។ សូមអញ្ជើញទស្សនាវីដេអូបទយកការណ៍ទាំងស្រុង៖