នៅរសៀលថ្ងៃទី១១ ខែវិច្ឆិកា ឆ្នាំ២០២៦ លោក សុខ ថុល អភិបាលរងខេត្តសៀមរាប បានអញ្ជើញដឹកនាំកិច្ចប្រជុំស្ដីពីការត្រួតពិនិត្យវឌ្ឍនភាពនៃការអនុវត្តគម្រោងផែនការសកម្មភាព (ផ.អ ៥) ឆ្នាំ២០២៦ និងការរៀបចំផែនការសកម្មភាពសម្រាប់ឆ្នាំ២០២៧ ដើម្បីពិនិត្យលើលទ្ធផលនៃការអនុវត្តផែនការសកម្មភាព និងការប្រើប្រាស់ថវិកាប្រចាំឆ្នាំរបស់រដ្ឋបាលថ្នាក់ក្រោមជាតិ ស្វែងយល់ពីឧបសគ្គនានាក្នុងដំណើរការអនុវត្តការងារ និងរកដំណោះស្រាយដើម្បីកែលម្អប្រសិទ្ធភាពការងារ។

ឯកឧត្ដម ប្រាក់ សោភ័ណ អភិបាលខេត្តសៀមរាប កាលពីព្រលប់ថ្ងៃទី១១ ខែវិច្ឆិកា ឆ្នាំ២០២៦ តាមរយៈបណ្ដាញសង្គមផ្លូវការបានថ្លែងអំណរគុណ និងចូលរួមអបអរសាទរ ចំពោះក្រុមកីឡាករទូក “ង” ហនុមានសៀមរាប របស់រដ្ឋបាលខេត្តសៀមរាប ដែលទទួលបានចំណាត់ថ្នាក់លេខ១ ក្នុងការប្រកួតកីឡាប្រពៃណីខ្នាតអន្តរជាតិ ទូក “ង” ទូកនាគ ទូកផ្កាចារ ជ្រើសរើសជើងឯកថ្នាក់ជាតិ ពានរង្វាន់ ឯកឧត្ដម អភិសន្ដិបណ្ឌិត ស សុខា លើកទី៣ ឆ្នាំ២០២៦ ដែលប្រព្រឹត្តទៅនៅទន្លេវ៉ៃគោ ខេត្តស្វាយរៀង កាលពីថ្ងៃទី៩ ដល់ទី១១ ខែវិច្ឆិកា ឆ្នាំ២០២៦នេះ។

ឯកឧត្តម ស៊ាន សន់ និងមហាឧបាសិកា សឿ សៀម ព្រមទាំងក្រុមគ្រួសារ និងពុទ្ធបរិស័ទជិតឆ្ងាយ បានរួមគ្នាប្រារព្ធពិធីអភិសេកព្រះពុទ្ធបដិមា ដង្ហែអង្គកឋិនទាន និងព្រះត្រ័យបិដក ប្រគេនព្រះសង្ឃដែលបានគង់ចាំព្រះវស្សាអស់ត្រីមាស ព្រមទាំងឧបត្ថម្ភព្រះត្រ័យបិដកសម្រាប់ជាប្រយោជន៍ដល់ការសិក្សារៀនសូត្រ និងការស្វែងយល់អំពីព្រះធម៌វិន័យក្នុងព្រះពុទ្ធសាសនា នៅវត្តស្រែណូយ ស្ថិតក្នុងស្រុកវ៉ារិន ខេត្តសៀមរាប កាលពីរសៀលថ្ងៃទី១១ ខែវិច្ឆិកា ឆ្នាំ២០២៦នេះ។

រដ្ឋបាលខេត្តសៀមរាប បានបង្ហាញជំហរគាំទ្រយ៉ាងពេញទំហឹង ចំពោះគម្រោងវិនិយោគរបស់ក្រុមហ៊ុន Yunnan Investment Holding Group ដោយផ្តោតសំខាន់លើការអភិវឌ្ឍវិស័យទេសចរណ៍ និងការកែលម្អហេដ្ឋារចនាសម្ព័ន្ធជុំវិញអាកាសយានដ្ឋានអន្តរជាតិសៀមរាបអង្គរ ដោយរដ្ឋបាលខេត្តនឹងបន្តយកចិត្តទុកដាក់ខ្ពស់លើការការពង្រឹងសន្តិសុខសាធារណៈ ការរៀបចំសណ្ដាប់ធ្នាប់ចរាចរណ៍ និងការកែលម្អបរិស្ថាន ព្រមទាំងធានាឱ្យបាននូវការផ្គត់ផ្គង់ទឹកស្អាត និងថាមពលអគ្គិសនីឱ្យបានរលូន ដើម្បីគាំទ្រដល់ប្រតិបត្តិការពាណិជ្ជកម្ម និងសកម្មភាពផ្សេងៗ ជុំវិញតំបន់អាកាសយានដ្ឋានអន្តរជាតិសៀមរាបអង្គរ។

នៅថ្ងៃទី១១ ខែវិច្ឆិកា ឆ្នាំ២០២៦នេះ ក្រុមប្រឹក្សាខេត្តសៀមរាប បានបន្តរៀបចំវេទិកាផ្សព្វផ្សាយ និងពិគ្រោះយោបល់ ដើម្បីប្រមូលក្ដីកង្វល់ និងដោះស្រាយ បំភ្លឺជូនប្រជាពលរដ្ឋ ក្នុងមូលដ្ឋានស្រុកអង្គរធំ ក្នុងន័យដើម្បីជំរុញក្នុងការអភិវឌ្ឍន៍មូលដ្ឋានឱ្យកាន់តែប្រសើរឡើង ព្រមទាំងលើកកម្ពស់ជីវភាពរបស់ប្រជាពលរដ្ឋតាមមូលដ្ឋាន។

នៅថ្ងៃទី១១ ខែវិច្ឆិកា ឆ្នាំ២០២៦នេះ មន្ទីរសេដ្ឋកិច្ច និងហិរញ្ញវត្ថុខេត្តសៀមរាប បានរៀបចំប្រជុំផ្សព្វផ្សាយប្រកាសលេខ ៣៩៣ សហរ.ប្រក.អលសា ចុះថ្ងៃទី១ ខែមិថុនា ឆ្នាំ២០២៦ របស់ក្រសួងសេដ្ឋកិច្ច និងហិរញ្ញវត្ថុ ស្ដីពីផែនការលទ្ធកម្ម ជូនដល់ថ្នាក់ដឹកនាំ និងមន្ត្រីពាក់ព័ន្ធមកពីមន្ទីរអង្គភាពក្នុងខេត្ត ក្នុងន័យធ្វើយ៉ាងណាដើម្បីឱ្យមានការពង្រឹងតម្លាភាព គណនេយ្យភាព និងប្រសិទ្ធភាពក្នុងការគ្រប់គ្រងថវិការដ្ឋ។