ក្រសួងទេសចរណ៍ សហការជាមួយសភាពាណិជ្ជកម្ម និងឧស្សាហកម្មបារាំងប្រចាំខេត្តសៀមរាប រួមជាមួយរដ្ឋបាលខេត្ត បានរៀបចំពិធីកាត់ខ្សែបូបើកសម្ពោធជាផ្លូវការ «ការតាំងពិព័រណ៍ភូមិវប្បធម៌ហ្វ្រង់កូហ្វូនី ២០២៦» នារសៀលថ្ងៃទី៦ ខែវិច្ឆិកា ឆ្នាំ២០២៦ ក្នុងគោលបំណងលើកកម្ពស់ភាពសម្បូរបែបនៃពហុវប្បធម៌ចម្រុះក្នុងសហគមន៍អន្តរជាតិហ្វ្រង់កូហ្វូនី បង្ហាញតម្លៃរួមនៃសាមគ្គីភាពរបស់បណ្តាប្រទេសប្រើប្រាស់ភាសាបារាំង ព្រមទាំងដើម្បីផ្សព្វផ្សាយពីសក្តានុពលទេសចរណ៍ និងលើកកម្ពស់វិស័យពាណិជ្ជកម្ម សេដ្ឋកិច្ច និងវប្បធម៌។

បងប្អូនប្រជាពលរដ្ឋដែលរងគ្រោះដោយសារជំនន់ទឹកភ្លៀងចំនួន ៥៧៣គ្រួសារ នៅក្នុងភូមិសាស្ត្រស្រុកជីក្រែង ខេត្តសៀមរាប បានទទួលស្រូវពូជពីប្រព័ន្ធស្បៀងបម្រុងកម្ពុជា សម្រាប់ដាំស្ដារឡើងវិញលើផ្ទៃដីរងការខូចខាតចំនួន ៧៣៦ហិកតា ស្របតាមបច្ចេកទេសដាំដុះរបស់ក្រសួងកសិកម្ម ដោយក្នុងមួយគ្រួសារទទួលបានពូជស្រូវ ១០០គីឡូក្រាម ដែលពិធីប្រគល់ធ្វើឡើងនៅថ្ងៃទី៦ ខែវិច្ឆិកា ឆ្នាំ២០២៦នេះ។

ក្នុងពិធីប្រកាសបិទផ្សាយជាសាធារណៈនូវឯកសារនៃការវិនិច្ឆ័យ សម្រាប់ការចុះបញ្ជីដីធ្លីមានលក្ខណៈជាប្រព័ន្ធ ស្ថិតក្នុងគោកដូង ស្រុកអង្គរជុំ ខេត្តសៀមរាប នាថ្ងៃទី៦ ខែវិច្ឆិកា ឆ្នាំ២០២៦ លោកស្រី ញឹម សុភៈ អនុប្រធានរៀបចំដែនដី នគររូបនីយកម្ម និងសំណង់ខេត្តសៀមរាប បានអំពាវនាវដល់ប្រជាពលរដ្ឋទាំងអស់ អញ្ជើញមកពិនិត្យនូវបញ្ជីក្បាលដីរបស់ខ្លួន ដើម្បីឱ្យមន្រ្ដីជំនាញធ្វើការកែតម្រូវបានទាន់ពេលវេលា ករណីមានការខុសឆ្គងត្រង់ចំណុចណាមួយ ដើម្បីចេញប័ណ្ណកម្មសិទ្ធិជូនដល់បងប្អូនប្រជាពលរដ្ឋ។

ប្រជាពលរដ្ឋរងគ្រោះ និងខូចខាតដំណាំស្រូវដោយសារជំនន់ទឹកភ្លៀងសរុបចំនួន ២ ៤០៣គ្រួសារ នៅក្នុងស្រុកអង្គរជុំ និងស្រុកស្រីស្នំ ខេត្តសៀមរាប បានទទួលអំណោយជាស្បៀងអាហារ គ្រឿងឧបភោគបរិភោគ និងគ្រាប់ពូជស្រូវពីប្រព័ន្ធស្បៀងបម្រុងកម្ពុជា ដើម្បីជួយស្តារជីវភាព និងការដាំដុះឡើងវិញ ដែលពិធីប្រគល់ធ្វើឡើងនៅថ្ងៃទី៦ ខែវិច្ឆិកា ឆ្នាំ២០២៦នេះ ក្រោមអធិបតីភាព ឯកឧត្តម អ៊ុក ឃ្នួច អនុប្រធានគណៈកម្មាធិការជាតិគ្រប់គ្រងគ្រោះមហន្តរាយ និងមានការចូលរួមពីសំណាក់ លោក អ៊ឹង គឹមលាង អភិបាលរងខេត្តសៀមរាប។

នៅព្រឹកថ្ងៃទី៦ ខែវិច្ឆិកា ឆ្នាំ២០២៦នេះ គ្រួសារប្រជាពលរដ្ឋជួបការខ្វះខាត ចាស់ជរា និងជនមានពិការភាព ចំនួន ៨០គ្រួសារ ក្នុងសង្កាត់គោកចក ក្រុងសៀមរាប បានទទួលអំណោយជាគ្រឿងឧបភោគបរិភោគ រួមមាន អង្ករ មី ត្រីខ ទឹកត្រី ទឹកស៊ីអ៊ីវ និងថវិកាពីរដ្ឋបាលសង្កាត់គោកចក ក្រោមវត្តមាននិមន្ត និងអញ្ជើញ ចូលរួមពីសំណាក់ ព្រះគ្រូ ហែម គឹមសាន ចៅអធិការវត្តប្រាសាទគោកចក និង លោក ហាយ យង់ អភិបាលរងក្រុងសៀមរាប ព្រមទាំងអាជ្ញាធរសង្កាត់ផងដែរ។

រដ្ឋបាលខេត្តសៀមរាប នៅថ្ងៃទី៦ ខែវិច្ឆិកា ឆ្នាំ២០២៦ នេះ បានរៀបចំយុទ្ធនាការដាំស្មៅ និងផ្កាលម្អនៅតាមបណ្ដោយមាត់ស្ទឹងសៀមរាប ត្រើយខាងកើត ចាប់ពីស្ពានព្រះរាជដំណាក់ ដល់ស្ពានវត្តរាជបូណ៌ ដោយមានការចូលរួមពីមន្ត្រីរាជការ អាជ្ញាធរក្រុង-សង្កាត់ និងភាគីពាក់ព័ន្ធ ក្នុងគោលបំណងបង្កើនគម្របបៃតង លើកកម្ពស់សោភ័ណភាព បរិស្ថាន អនាម័យ និងផាសុកភាពសាធារណៈ ព្រមទាំងបង្កើនភាពទាក់ទាញដល់ប្រជាពលរដ្ឋ និងភ្ញៀវទេសចរជាតិ-អន្តរជាតិ។