អនុប្រធានមន្ទីរព័ត៌មានខេត្តសៀមរាប ណែនាំឱ្យពង្រឹងប្រសិទ្ធភាពការងារ គ្រប់គ្រងមន្ត្រី និងលើកកម្ពស់គុណភាពផលិតផលព័ត៌មានក្នុងមន្ទីរ

ក្នុងឱកាសអញ្ជើញដឹកនាំកិច្ចប្រជុំតម្រង់ទិស និងពង្រឹងរបៀបរបបការងារ ជូនដល់ថ្នាក់ដឹកនាំការិយាល័យ និងមន្ត្រីមន្ទីរ នៅថ្ងៃទី៥ ខែតុលា ឆ្នាំ២០២៦ លោក យឿន ចាន់ អនុប្រធានមន្ទីរព័ត៌មានខេត្តសៀមរាប ទទួលបន្ទុករួម បានណែនាំដល់ថ្នាក់ដឹកនាំការិយាល័យទាំងអស់ ត្រូវយកចិត្តទុកដាក់តាមដាន និងត្រួតពិនិត្យលើរបាយការណ៍សកម្មភាពការងារប្រចាំថ្ងៃរបស់មន្ត្រីឱ្យបានជាប់លាប់។ ជាពិសេសត្រូវរៀបចំកិច្ចប្រជុំផ្ទៃក្នុង ប្រចាំខែឱ្យបានខ្លី ប៉ុន្តែមានខ្លឹមសារគ្រប់ជ្រុងជ្រោយ ដើម្បីពិភាក្សា ដោះស្រាយបញ្ហាប្រឈម និងតម្រង់ទិសការងារបន្តឱ្យបានទាន់ពេលវេលា។